లక్షల కోట్ల ఐపీఎల్.. 18 ఏళ్లలో అత్యధికంగా సంపాదించింది కోహ్లీనే!

ఐపీఎల్ ప్రపంచంలోనే అత్యంత ఖరీదైన క్రీడా సంపదగా ఎదుగుతోంది. తాజాగా ఫనాటిక్ స్పోర్ట్స్, హురున్ సంస్థలు విడుదల చేసిన నివేదిక ప్రకారం 10 ఐపీఎల్ ఫ్రాంచైజీల మొత్తం విలువ రూ.1.63 లక్షల కోట్లకు చేరింది. ఇందులో షారుఖ్ ఖాన్ యాజమాన్యంలోని కోల్‌కతా నైట్ రైడర్స్ (కేకేఆర్) అత్యంత విలువైన జట్టుగా నిలిచింది. కేకేఆర్ బ్రాండ్ విలువ రూ.19,200 కోట్లుగా ఉండగా, ఆ తర్వాతి స్థానాల్లో చెరో రూ.18,400 కోట్ల విలువతో ముంబై ఇండియన్స్, చెన్నై సూపర్ కింగ్స్ నిలిచాయి.

మరోవైపు ఐపీఎల్ 18 ఏళ్ల చరిత్రలో అత్యధికంగా సంపాదించిన ఆటగాడిగా విరాట్ కోహ్లీ రికార్డు సృష్టించాడు. రాయల్ ఛాలెంజర్స్ బెంగళూరు (ఆర్సీబీ) జట్టుతో సుదీర్ఘ అనుబంధం ద్వారా కోహ్లీ ఇప్పటివరకు రూ.230 కోట్లు ఆర్జించినట్లు ఈ నివేదిక వెల్లడించింది.

ఈ నివేదిక భవిష్యత్ అంచనాలను కూడా ప్రస్తావించింది. ప్రస్తుతం సగటున 1.8 బిలియన్ డాలర్లుగా ఉన్న ఒక్కో ఐపీఎల్ జట్టు విలువ, 2032 నాటికి 15 బిలియన్ డాలర్లకు పెరిగే అవకాశం ఉందని పేర్కొంది. ఈ వృద్ధిపై హురున్ ఇండియా వ్యవస్థాపకుడు అనస్ రెహ్మాన్ జునైద్ మాట్లాడుతూ.. "భారత్ ఇప్పుడు వృద్ధికి పునాది దశలో ఉంది. కింది స్థాయిలో ప్రతిభ తయారవుతుండగా, అగ్రస్థాయిలో పెట్టుబడులు వస్తున్నాయి. త్వరలో బిలియన్ల కొద్దీ వినియోగదారులు ఇందులో పాలుపంచుకోబోతున్నారు" అని వివరించారు.