చంద్రబాబు ఇంటి పక్కన ఎవరూ నివసించకూడదని ఇలా చేస్తున్నారా?: పేర్ని నాని

ఆంధ్రప్రదేశ్ మాజీ మంత్రి, వైసీపీ నేత పేర్ని నాని ఏపీ ముఖ్యమంత్రి చంద్రబాబుపై చేసిన విమర్శలు రాజకీయంగా దుమారం రేపుతున్నాయి. ముఖ్యంగా అమరావతి రాజధాని ప్రాంతంలో చంద్రబాబు నిర్మించుకుంటున్న నివాసం మరియు అక్కడ జరుగుతున్న ప్లాట్ల కేటాయింపులపై ఆయన తీవ్రస్థాయిలో మండిపడ్డారు.

ఏపీ రాజధాని అమరావతిలో ముఖ్యమంత్రి చంద్రబాబు ఇంటిని నిర్మించుకుంటున్న సంగతి తెలిసిందే. ఇంటి నిర్మాణం దాదాపుగా పూర్తి అవుతోంది. ఈ నేపథ్యంలో చంద్రబాబుపై వైసీపీ నేత, మాజీ మంత్రి పేర్ని నాని విమర్శలు గుప్పించారు. చంద్రబాబు కడుతున్న ఇంటి సమీపంలో సుమారు 3800 గజాల భూమిని 'గ్రీన్ బెల్ట్'గా ప్రకటించడంపై పేర్ని నాని అభ్యంతరం వ్యక్తం చేశారు. గతంలో రెసిడెన్షియల్ ఏరియాగా ఉన్న ఆ ప్రాంతం అకస్మాత్తుగా గ్రీన్ బెల్ట్‌గా ఎలా మారుతుందని ఆయన ప్రశ్నించారు. చంద్రబాబు ఇంటి పక్కన ఇతరులెవరూ నివసించకూడదనే ఉద్దేశంతోనే ఇలా చేస్తున్నారా అని నిలదీశారు. సాధారణ రైతులకు ఇవ్వని ప్రాధాన్యత చంద్రబాబు బినామీలకు మాత్రం అమరావతిలో దక్కుతోందని ఆరోపించారు.

సచివాలయం, అసెంబ్లీ, హైకోర్టు వంటి కీలక భవనాల మధ్యలోనే చంద్రబాబుకు ప్లాటు ఎలా కేటాయిస్తారని ఆయన ప్రశ్నించారు. ఈ నివాసాన్ని ఏ రకమైన 'ప్యాలెస్' అని పిలవాలని ఎద్దేవా చేశారు. రాజధానిని అవినీతికి కేంద్రంగా మార్చేశారని విమర్శిస్తూ, రైతులకు చెందాల్సిన న్యాయం కేవలం కొందరికే పరిమితం అవుతోందని ఆవేదన వ్యక్తం చేశారు. రాజధాని నిర్మాణంలో పారదర్శకత లేదని, కేవలం సొంత ప్రయోజనాల కోసమే నిర్ణయాలు జరుగుతున్నాయని ఆయన విమర్శించారు.