టీమిండియా టీ20 కెప్టెన్సీకి గండం.. సూర్య స్థానంలో సంజూ శాంసన్?

టీమిండియా టీ20 కెప్టెన్‌గా సూర్యకుమార్ యాదవ్ రోజులు దగ్గరపడినట్టే కనిపిస్తున్నాయి. ఆయన స్థానాన్ని భర్తీ చేసేందుకు కొత్త ఆటగాళ్ల పేర్లు బలంగా వినిపిస్తున్నాయి. ఐపీఎల్ 2026 సీజన్‌లో సూర్య పేలవ ఫామ్‌తో ఇబ్బంది పడుతుండటంతో అతని కెప్టెన్సీపై నీలినీడలు కమ్ముకున్నాయి. ఈ నేపథ్యంలో వికెట్ కీపర్ బ్యాటర్ సంజూ శాంసన్, శ్రేయస్ అయ్యర్ పేర్లు తదుపరి కెప్టెన్సీ రేసులో ముందున్నాయి.

భారత జట్టు జూన్, జులై నెలల్లో ఇంగ్లండ్, ఐర్లాండ్ పర్యటనలకు వెళ్లనుంది. ఈ పర్యటనల కోసం జట్టు ఎంపిక పూర్తిగా ఐపీఎల్ ప్రదర్శనపై ఆధారపడి ఉంటుంది. ప్రస్తుత సీజన్‌లో సూర్యకుమార్ పరుగులు చేయడానికి ఇబ్బంది పడుతుండగా, శ్రేయస్ అయ్యర్, సంజూ శాంసన్ ఇద్దరూ టాప్ రన్ స్కోరర్లుగా రాణిస్తున్నారు. ఎన్డీటీవీ తన కథనంలో శ్రేయస్ అయ్యర్‌ను తదుపరి కెప్టెన్‌గా బీసీసీఐ పరిశీలిస్తోందని పేర్కొనగా, తాజాగా సంజూ శాంసన్ కూడా ఈ రేసులో ఉన్నట్లు తెలుస్తోంది. ఐపీఎల్ 2026 సీజన్‌కు ముందు చెన్నై సూపర్ కింగ్స్ జట్టులో చేరిన సంజూ, అద్భుతమైన ఫామ్‌తో ఆకట్టుకుంటున్నాడు. గతంలో రాజస్థాన్ రాయల్స్‌కు కెప్టెన్‌గా వ్యవహరించిన అనుభవం కూడా అతనికి కలిసొచ్చే అంశం.

దైనిక్ జాగరణ్ కథనం ప్రకారం కెప్టెన్సీ రేసులో సంజూ శాంసన్‌కు కొన్ని అంశాలు అనుకూలంగా ఉన్నాయి. ముఖ్యంగా 2024 టీ20 ప్రపంచకప్ గెలిచిన నాటి నుంచి సంజూ భారత జట్టులో నిలకడగా కొనసాగుతున్నాడు. ఈ ఏడాది ప్రపంచకప్ విజయంలోనూ కీలక పాత్ర పోషించాడు. ఇప్పటివరకు 62 అంతర్జాతీయ టీ20 మ్యాచ్‌లలో 3 సెంచరీలు, 6 హాఫ్ సెంచరీలతో 1,399 పరుగులు చేసి తనను తాను నిరూపించుకున్నాడు.

మరోవైపు పంజాబ్ కింగ్స్ తరఫున శ్రేయస్ అయ్యర్ పరుగులు సాధిస్తున్నప్పటికీ, అతను చాలా కాలంగా భారత టీ20 జట్టుకు దూరంగా ఉన్నాడు. అతను చివరిసారిగా 2023, డిసెంబర్ లో భారత్ తరఫున టీ20 మ్యాచ్ ఆడాడు. ఇంత సుదీర్ఘ విరామం తర్వాత నేరుగా జట్టులోకి వచ్చి కెప్టెన్ అవ్వడం కష్టమనే వాదనలు వినిపిస్తున్నాయి. ఏదేమైనా ఇంగ్లండ్, ఐర్లాండ్ పర్యటనలకు సెలక్షన్ కమిటీ సూర్యకుమార్‌కే మరో అవకాశం ఇచ్చే సూచనలున్నాయి. కానీ, ఈ సిరీస్‌లో కూడా విఫలమైతే మాత్రం కెప్టెన్సీ మార్పు ఖాయమని విశ్లేషకులు అభిప్రాయపడుతున్నారు.