కోహ్లీ సలహాతో అతడినే బోల్తా కొట్టించిన యువ బౌలర్

రాయల్ ఛాలెంజర్స్ బెంగళూరు స్టార్ బ్యాటర్ విరాట్ కోహ్లీ ఇచ్చిన సలహాని అతనిపైనే అస్త్రంగా ప్రయోగించి వికెట్ తీశానని లక్నో సూపర్ జెయింట్స్ యువ పేసర్ ప్రిన్స్ యాదవ్ వెల్లడించాడు. గురువారం ఏకనా స్టేడియంలో జరిగిన మ్యాచ్‌లో కోహ్లీ రెండు బంతులు మాత్రమే ఆడి డకౌట్‌గా వెనుదిరిగాడు. ఈ కీలక వికెట్‌ను ప్రిన్స్ యాదవ్ తీయడం విశేషం.

ప్రిన్స్ యాదవ్ మొదట ఒక అవుట్‌స్వింగర్ వేసి, ఆ తర్వాత 140.4 కిలోమీటర్ల వేగంతో పదునైన ఇన్‌స్వింగర్‌ను సంధించాడు. బంతిని అంచనా వేయడంలో విఫలమైన కోహ్లీ క్లీన్ బౌల్డ్ అయ్యాడు. రన్ ఛేజింగ్‌లో విరాట్ కోహ్లీ డకౌట్ కావడం గత 9 ఏళ్లలో ఇదే తొలిసారి. 2017లో ఈడెన్ గార్డెన్స్‌లో కోల్‌కతా నైట్ రైడర్స్‌పై చివరిసారిగా అతడు డకౌట్ అయ్యాడు.

మ్యాచ్ అనంతరం ప్రిన్స్ యాదవ్ మాట్లాడుతూ ఆసక్తికర విషయాన్ని పంచుకున్నాడు. "గత మ్యాచ్ తర్వాత విరాట్ భయ్యా నాతో మాట్లాడారు. పిచ్‌పై బంతి సీమ్ అవుతున్నప్పుడు, ఒకే లెంగ్త్‌లో బౌలింగ్ చేయాలని ఆయనే నాకు సలహా ఇచ్చాడు" అని తెలిపాడు. కోహ్లీ ఇచ్చిన ఈ సలహానే తాను అతడికి వ్యతిరేకంగా ఉపయోగించానని పరోక్షంగా చెప్పాడు.

ఈ మ్యాచ్‌లో ప్రిన్స్ అద్భుతంగా రాణించాడు. కోహ్లీతో పాటు దేవదత్ పడిక్కల్, జితేష్ శర్మ వికెట్లను కూడా పడగొట్టి 4 ఓవర్లలో 33 పరుగులిచ్చి 3 వికెట్లు తీశాడు. ఈ సీజన్‌లో ఇప్పటివరకు 10 మ్యాచ్‌ల్లో 16 వికెట్లు తీసి, లక్నో తరఫున అత్యధిక వికెట్లు తీసిన బౌలర్‌గా నిలిచాడు.

ఈ విజయంతో లక్నో తమ ప్లేఆఫ్ ఆశలను సజీవంగా ఉంచుకుంది. వరుసగా ఆరు ఓటముల తర్వాత విజయం సాధించింది. అయినప్పటికీ, 6 పాయింట్లతో లక్నో పట్టికలో అట్టడుగు స్థానంలోనే ఉంది. మే 10న చెన్నై సూపర్ కింగ్స్‌తో తమ తదుపరి మ్యాచ్ ఆడనుంది.