నెదర్లాండ్స్‌లో ఇద్దరు రాజకుమార్తెలపై హత్యకు కుట్ర పన్నారన్న ఆరోపణలతో ఓ వ్యక్తిని అరెస్ట్ చేయడం సంచలనం సృష్టిస్తోంది. డచ్ సింహాసనానికి వారసురాలైన యువరాణి కాథరినా-అమాలియా (22), ఆమె సోదరి యువరాణి అలెక్సియా (20)లే లక్ష్యంగా దాడికి ప్లాన్ చేసినట్లు అధికారులు వెల్లడించారు. ఈ కేసుకు సంబంధించి సోమవారం నిందితుడిని కోర్టులో హాజరుపరచనున్నారు.

ఈ ఏడాది ఫిబ్రవరిలో హేగ్ నగరంలో 33 ఏళ్ల వ్యక్తిని అధికారులు అరెస్ట్ చేశారు. అతడి వద్ద నుంచి రెండు గొడ్డళ్లను స్వాధీనం చేసుకున్నారు. ఒక గొడ్డలిపై 'అలెక్సియా', ఇజ్రాయెల్ గూఢచారి సంస్థ 'మొస్సాద్', నాజీ నినాదమైన 'సీగ్ హీల్' వంటి పదాలు చెక్కి ఉండటం తీవ్ర కలకలం రేపింది. దీంతో పాటు 'అమాలియా', 'అలెక్సియా', 'బ్లడ్‌బాత్' (రక్తపాతం) అని రాసి ఉన్న చేతిరాత నోట్‌ను కూడా అధికారులు కనుగొన్నారు.

ఈ అరెస్ట్‌కు సంబంధించిన వివరాలను పబ్లిక్ ప్రాసిక్యూషన్ కార్యాలయం తాజాగా వెల్లడించింది. నిందితుడి తరఫు న్యాయవాది కోర్టు విచారణకు ముందు వివరాలు వెల్లడించేందుకు నిరాకరించారు. కాగా, డచ్ రాజకుటుంబం కూడా ఈ ఘటనపై తక్షణమే స్పందించలేదు.

యువరాణి అమాలియాకు భద్రతాపరమైన ముప్పు ఎదురవడం ఇది మొదటిసారి కాదు. 2022లో ఆర్గనైజ్డ్ క్రైమ్ ముఠాల నుంచి తీవ్రమైన బెదిరింపులు రావడంతో ఆమె ఆమ్‌స్టర్‌డామ్‌లోని విద్యార్థి వసతి గృహాన్ని విడిచిపెట్టి, దాదాపు ఏడాది పాటు స్పెయిన్‌లోని మాడ్రిడ్‌లో నివసించాల్సి వచ్చింది. తాజా ఘటనతో రాజకుటుంబ భద్రతపై మరోసారి ఆందోళనలు వ్యక్తమవుతున్నాయి.