ఆన్‌లైన్ వేదికగా జరుగుతున్న మోసాలపై ప్రజలు అప్రమత్తంగా ఉండాలని టీడీపీ ఎంపీ, లోక్‌సభాపక్ష నేత లావు శ్రీకృష్ణదేవరాయలు సూచించారు. సెకండ్ హ్యాండ్ వస్తువుల పేరుతో సైబర్ నేరగాళ్లు అమాయకులను ఎలా దోచుకుంటున్నారో వివరిస్తూ ఆయన ఒక కీలకమైన పోస్ట్ చేశారు. వైజాగ్ సిటీ పోలీసులు రూపొందించిన అవగాహన వీడియోను షేర్ చేస్తూ, ఆన్‌లైన్ బేరాల వెనుక ఉన్న ప్రమాదాలను ఆయన ఎత్తిచూపారు.

"ఉచితంగా ఏదీ రాదు, తక్కువ ధరకు అంతకన్నా రాదు" అని గుర్తుంచుకోవాలని శ్రీకృష్ణదేవరాయలు ప్రజలకు విజ్ఞప్తి చేశారు. ముఖ్యంగా ఓఎల్‌ఎక్స్ వంటి ప్లాట్‌ఫామ్‌లలో కొందరు కేటుగాళ్లు తాము ఆర్మీ లేదా పోలీస్ అధికారులమని చెప్పి, నకిలీ ఐడీ కార్డులు చూపిస్తూ నమ్మబలుకుతున్నారని తెలిపారు. తక్కువ ధరకే వస్తువులు అమ్ముతామని చెప్పి, డబ్బులు తీసుకుని మోసం చేస్తున్నారని వివరించారు. ఇలాంటి మోసాల బారిన పడి కష్టార్జితాన్ని కోల్పోవద్దని ఆయన హెచ్చరించారు.

ఒకవేళ పొరపాటున సైబర్ మోసగాళ్ల చేతిలో డబ్బులు కోల్పోతే ఏమాత్రం ఆలస్యం చేయవద్దని ఆయన సూచించారు. మోసపోయినట్టు గ్రహించిన మొదటి గంట అత్యంత కీలకమని, వెంటనే సైబర్ క్రైమ్ హెల్ప్‌లైన్ నంబర్ '1930'కు ఫిర్యాదు చేస్తే డబ్బు తిరిగి పొందే అవకాశాలు మెరుగ్గా ఉంటాయని తెలిపారు. ఈ సమాచారాన్ని అందరికీ షేర్ చేసి, ఇతరులను కూడా కాపాడాలని ఆయన కోరారు.