'జన నాయగన్' మూవీ లీక్.. సెన్సార్ బోర్డుపై కమల్ హాసన్ ఫైర్

తమిళ సూపర్ స్టార్ విజయ్ నటిస్తున్న అత్యంత ప్రతిష్ఠాత్మక చిత్రం 'జన నాయగన్' థియేటర్లలో విడుదల కాకముందే ఆన్‌లైన్‌లో లీక్ అవ్వడం చిత్ర పరిశ్రమను దిగ్భ్రాంతికి గురిచేసింది. ఈ ఘటనపై విలక్షణ నటుడు, రాజకీయ నేత కమల్ హాసన్ సోషల్ మీడియా వేదికగా స్పందిస్తూ తీవ్ర ఆవేదన వ్యక్తం చేశారు. ఇది కేవలం ఒక అనుకోని ప్రమాదం కాదని, మన వ్యవస్థలోని లోపాల వల్లే ఇలా జరిగిందని ఆయన అభిప్రాయపడ్డారు.

కమల్ హాసన్ తన పోస్ట్‌లో ప్రధానంగా సెన్సార్ బోర్డు తీరును తప్పుబట్టారు. సినిమా పనులు సకాలంలో పూర్తయినా, సెన్సార్ ప్రక్రియలో జరిగిన విపరీతమైన జాప్యం కారణంగానే పైరసీకి అవకాశం దొరికిందని విమర్శించారు. చట్టపరమైన అనుమతులు, ధ్రువీకరణ పత్రాల విషయంలో జాప్యం జరిగినప్పుడు ఇటువంటి అక్రమ మార్గాలు పుట్టుకొస్తాయని ఆయన ఆవేదన వ్యక్తం చేశారు.

పైరసీని కేవలం ఒక నేరంగానే కాకుండా, కళ, కళాకారుడిపై జరిగే దాడిగా కమల్ వర్ణించారు. వందలాది మంది కళాకారులు, సాంకేతిక నిపుణులు ఏళ్ల తరబడి పడిన శ్రమ ఈ ఒక్క లీక్‌తో ప్రమాదంలో పడిందని ఆయన పేర్కొన్నారు. నిజాయతీగా పన్నులు చెల్లిస్తూ సినిమాను నమ్ముకున్న నిర్మాతలు, పంపిణీదారులు, థియేటర్ యజమానుల జీవితాలు దీనివల్ల ఛిన్నాభిన్నం అవుతాయని హెచ్చరించారు.

గతంలో తన సినిమాలకు ఇబ్బందులు ఎదురైనప్పుడు ప్రేక్షకులు ఏ విధంగా అండగా నిలిచారో గుర్తుచేస్తూ, ఇప్పుడు కూడా అదే స్ఫూర్తిని చాటాలని కోరారు. "వ్యవస్థ విఫలమైనప్పుడు సినిమాను ఎవరు కాపాడతారు?" అని ప్రశ్నిస్తూ, నిజమైన సినిమా ప్రేమికులంతా ఏకమై ఈ చిత్రాన్ని కేవలం థియేటర్లలోనే చూడాలని విజ్ఞప్తి చేశారు. పైరసీ రాజకీయాలకు అతీతమైనదని, సినిమా మనుగడ కోసం ప్రతి ఒక్కరూ బాధ్యతగా వ్యవహరించాలని ఆయన పిలుపునిచ్చారు.