'ప్రతి రక్తదాతా.. జీవదాతే'.. పేదల జీవితాలకు ఎన్టీఆర్ ట్రస్ట్ భరోసా: నారా భువనేశ్వరి

రక్తదానం కేవలం దానం మాత్రమే కాదని, అది మరో మనిషి ప్రాణానికి ఇచ్చే భరోసా అని ఎన్టీఆర్ మెమోరియల్ ట్రస్ట్ మేనేజింగ్ ట్రస్టీ నారా భువనేశ్వరి అన్నారు. అత్యవసర పరిస్థితుల్లో రక్తం అవసరమైన కుటుంబం పడే ఆవేదనను అర్థం చేసుకుని, పేద రోగులకు అండగా నిలవాలనే లక్ష్యంతోనే ఈ సేవా కార్యక్రమాలను విస్తరిస్తున్నట్లు తెలిపారు. 

విజయవాడలో ఎన్టీఆర్ మెమోరియల్ ట్రస్ట్ ఆధ్వర్యంలో నూతనంగా ఏర్పాటు చేసిన తలసేమియా కేర్ సెంటర్, ఆధునిక రక్తనిధి కేంద్రాన్ని (బ్లడ్ బ్యాంక్) ఆమె శుక్రవారం ప్రారంభించారు. ఈ కేంద్రాన్ని విజయవాడ నగర ప్రజలకు అంకితం చేస్తున్నట్లు ప్రకటించారు.

ఈ సందర్భంగా నారా భువనేశ్వరి మాట్లాడుతూ, విజయవాడలో ఏర్పాటు చేసిన ఈ భవనం కేవలం కట్టడం కాదని, పేద రోగుల జీవితాలకు వారధి అని అభివర్ణించారు. ఇది ప్రజల సేవ, నమ్మకం, భరోసాకు చిరునామాగా నిలుస్తుందని ఆశాభావం వ్యక్తం చేశారు. ఆరోగ్యంగా ఉన్న ప్రతి ఒక్కరూ రక్తదానం చేసి ప్రాణదాతలుగా నిలవాలని పిలుపునిచ్చారు. 

స్వర్గీయ ఎన్టీఆర్‌కు ప్రజలంటే అపారమైన ప్రేమ అని, వారి కోసం పనిచేయడమే జీవితంగా భావించేవారని గుర్తు చేసుకున్నారు. సమాజంలో చివరి వ్యక్తికి సైతం మెరుగైన జీవనం అందాలన్న ఆయన ఆశయాలను ముందుకు తీసుకెళ్లేందుకే ముఖ్యమంత్రి చంద్రబాబు ఈ ట్రస్ట్‌ను స్థాపించారని వివరించారు.

29 ఏళ్లుగా నిరంతర సేవ
గత 29 ఏళ్లుగా ఎన్టీఆర్ మెమోరియల్ ట్రస్ట్ ఆరోగ్యం, విద్య, మహిళా సాధికారత, జీవనోపాధి, స్వచ్ఛమైన తాగునీరు వంటి అనేక రంగాల్లో సేవలందిస్తోందని భువనేశ్వరి తెలిపారు. ట్రస్ట్ మేనేజింగ్ ట్రస్టీగా ఈ సేవా కార్యక్రమాల్లో భాగస్వామిని కావడం తన అదృష్టమని అన్నారు. ఇది ఏ ఒక్కరికో పరిమితమైన సంస్థ కాదని, సేవ చేయాలనే తపన ఉన్న ప్రతి ఒక్కరిదని పేర్కొన్నారు. 

ప్రజల నమ్మకంతో నిర్మించిన ఈ సేవా యజ్ఞంలో అందరూ భాగస్వాములు కావాలని కోరారు. సంజీవని మొబైల్ క్లినిక్స్, ఎన్టీఆర్ ఆరోగ్య రథాల ద్వారా రెండు తెలుగు రాష్ట్రాల్లోని మారుమూల, గిరిజన ప్రాంతాల ప్రజల వద్దకే వెళ్లి ఉచితంగా వైద్యం, మందులు అందిస్తున్నట్లు వివరించారు. ఎన్టీఆర్ సుజల కార్యక్రమం ద్వారా పలు ప్రాంతాల్లో ఆర్వో ప్లాంట్లు ఏర్పాటు చేసి సురక్షిత తాగునీరు అందిస్తున్నామని చెప్పారు.

మహిళా సాధికారత, విద్యకు ప్రాధాన్యం
మహిళా సాధికారతకు ట్రస్ట్ పెద్దపీట వేస్తోందని భువనేశ్వరి అన్నారు. మహిళలకు కేవలం శిక్షణ ఇవ్వడమే కాకుండా, వారిలో ఆత్మవిశ్వాసం నింపి కుటుంబానికి అండగా నిలబడేలా ప్రోత్సహిస్తున్నామని తెలిపారు. స్త్రీశక్తి హస్తకళా స్టోర్ ద్వారా మహిళలు తయారు చేసిన ఉత్పత్తులకు మార్కెటింగ్ సౌకర్యం కల్పిస్తున్నట్లు పేర్కొన్నారు. విద్యారంగంలోనూ పేద విద్యార్థులను భవిష్యత్తులో దేశానికి ఉపయోగపడే పౌరులుగా తీర్చిదిద్దుతున్నామని చెప్పారు. వరదలు, తుఫాన్లతో పాటు కోవిడ్ వంటి ప్రకృతి విపత్తుల సమయంలోనూ బాధితులకు అండగా నిలిచామని గుర్తు చేశారు.

తలసేమియా చిన్నారులకు బాసట
తలసేమియా వ్యాధితో బాధపడే చిన్నారులకు నిరంతరం రక్తం అవసరమని, వారి కుటుంబాలు పడే ఆందోళనను దృష్టిలో ఉంచుకుని ఈ ప్రత్యేక కేర్‌ సెంటర్‌ను ఏర్పాటు చేసినట్లు భువనేశ్వరి తెలిపారు. హైదరాబాద్‌‍లో ఇప్పటికే తలసేమియా చిన్నారులకు ఉచితంగా రక్తం, మందులు, ఫిల్టర్లు అందిస్తున్నామని, ఇప్పుడు విజయవాడలోనూ ఈ సేవలు అందుబాటులోకి తెచ్చామని చెప్పారు. 

గుంటూరు, విశాఖపట్నం, తిరుపతి, రాజమహేంద్రవరంలో ఇప్పటికే రక్తనిధి కేంద్రాలు పనిచేస్తున్నాయని, త్వరలో అనంతపురంలోనూ మరో కేంద్రాన్ని ప్రారంభిస్తామని వెల్లడించారు. ప్రతి రక్తదాత ఒక జీవదాత అని, వారి సహకారంతో ఎంతోమంది ప్రాణాలను కాపాడవచ్చని అన్నారు. ఈ కార్యక్రమంలో ఎన్టీఆర్ ట్రస్ట్ సీఈఓ రాజేంద్ర, సీఓఓ గోపి పాల్గొన్నారు. ట్రస్ట్‌కు విరాళాలు అందించిన దాతలను, సేవలందించిన వారిని భువనేశ్వరి సత్కరించారు.