ఇరాన్‌పై అమెరికా దాడి.. భారత్ రావాల్సిన ఇరాన్ విమానం ధ్వంసం

పశ్చిమాసియాలో కొనసాగుతున్న ఉద్రిక్తతల నడుమ ఇరాన్‌లోని మషద్ విమానాశ్రయంలో సోమవారం తీవ్ర పరిణామం చోటుచేసుకుంది. అమెరికా జరిపినట్లుగా చెబుతున్న వైమానిక దాడిలో 'మహాన్ ఎయిర్' సంస్థకు చెందిన ఓ విమానం ధ్వంసమైంది. భారత్ నుంచి మానవతా సాయంగా అందాల్సిన వైద్య సామాగ్రిని తీసుకెళ్లేందుకు సిద్ధమైన విమానంపై దాడి జరగడం ఆందోళన కలిగిస్తోంది.

ఈ విమానం ఏప్రిల్ 1న న్యూఢిల్లీకి చేరుకుని, ఇరాన్ ప్రజల కోసం అవసరమైన వైద్య సామగ్రిని, ఇతర అత్యవసర వస్తువులను తీసుకెళ్లాల్సి ఉంది. అయితే, మషద్ విమానాశ్రయంలో జరిగిన ఈ దాడిలో విమానం దెబ్బతినడంతో భారత్ నుంచి సహాయాన్ని స్వీకరించే కార్యక్రమంపై నీలినీడలు కమ్ముకున్నాయని ఇరాన్ అధికారులు తెలిపారు. ఈ దాడితో తమ మిషన్‌కు తీవ్ర ఆటంకం ఏర్పడిందని వారు ఆవేదన వ్యక్తం చేశారు.

ఇప్పటికే మార్చి 18న భారత్ తొలి విడత వైద్య సహాయాన్ని ఇరానియన్ రెడ్ క్రెసెంట్ సొసైటీ ద్వారా ఇరాన్‌కు పంపింది. ఈ సహాయం పట్ల న్యూఢిల్లీలోని ఇరాన్ రాయబార కార్యాలయం భారత ప్రభుత్వానికి, ప్రజలకు కృతజ్ఞతలు కూడా తెలిపింది. మహాన్ ఎయిర్ అనేది పశ్చిమాసియా, మధ్య ఆసియా, దక్షిణాసియాలో సేవలు అందిస్తున్న ఒక ప్రైవేట్ విమానయాన సంస్థ. కాగా, ఈ వైమానిక దాడిని అమెరికా అధికారులు ఇప్పటివరకు అధికారికంగా ధ్రువీకరించలేదు.