రేపు శ్రీకాకుళం జిల్లాలో ముఖ్యమంత్రి చంద్రబాబు పర్యటన

ఏపీ ముఖ్యమంత్రి చంద్రబాబు రేపు (మే 16) శ్రీకాకుళం జిల్లాలో పర్యటించనున్నారు. నరసన్నపేటలో జరిగే ‘స్వర్ణాంధ్ర – స్వచ్ఛాంధ్ర’ కార్యక్రమంలో ఆయన పాల్గొంటారు. సీఎం పర్యటనకు సంబంధించిన షెడ్యూల్‌ను అధికారులు ఖరారు చేశారు.

వివరాల ప్రకారం, ముఖ్యమంత్రి శనివారం ఉదయం 9 గంటలకు ఉండవల్లిలోని తన నివాసం నుంచి బయలుదేరి, ఉదయం 10:40 గంటలకు శ్రీకాకుళం జిల్లా నరసన్నపేట మండలం తామ్రపల్లికి చేరుకుంటారు. అక్కడి నుంచి నరసన్నపేటలో ఏర్పాటు చేసిన ప్రజావేదికకు హాజరవుతారు. ఉదయం 11 గంటల నుంచి మధ్యాహ్నం 12:45 గంటల వరకు ‘స్వర్ణాంధ్ర – స్వచ్ఛాంధ్ర’ కార్యక్రమంలో పాల్గొంటారు.

అనంతరం మధ్యాహ్నం 1:20 గంటలకు నరసన్నపేటలోని ఎస్‌డబ్ల్యూపీసీ షెడ్ వద్ద ప్రజలతో సమావేశమవుతారు. ఈ సందర్భంగా స్థానిక సమస్యలు, అభివృద్ధి పనులపై వారితో నేరుగా చర్చిస్తారు. మధ్యాహ్నం 2:10 గంటల నుంచి తామ్రపల్లిలో పార్టీ కేడర్‌తో ప్రత్యేకంగా సమావేశమై, పార్టీ శ్రేణులకు దిశానిర్దేశం చేస్తారు. సాయంత్రం 3:55 గంటలకు తామ్రపల్లి నుంచి తిరుగుపయనమై, 5:35 గంటలకు ఉండవల్లి నివాసానికి చేరుకుంటారు.

రాష్ట్రవ్యాప్తంగా గత 16 నెలలుగా ప్రతీ నెలా మూడో శనివారం ప్రభుత్వం ‘స్వర్ణాంధ్ర-స్వచ్ఛాంధ్ర’ కార్యక్రమాన్ని నిర్వహిస్తోంది. పరిశుభ్రత, పర్యావరణ పరిరక్షణ వంటి అంశాలపై ప్రజల్లో చైతన్యం తీసుకురావడమే ఈ కార్యక్రమ ముఖ్య ఉద్దేశం.