ఐపీఎల్ 2026 సీజన్‌లో భాగంగా లక్నో సూపర్ జెయింట్స్‌తో మ్యాచ్‌లో చెన్నై సూపర్ కింగ్స్ భారీ స్కోరు సాధించింది. టాస్ ఓడి మొదట బ్యాటింగ్ చేసిన సీఎస్‌కే, నిర్ణీత 20 ఓవర్లలో 5 వికెట్ల నష్టానికి 187 పరుగులు చేసింది. యువ బ్యాటర్ కార్తీక్ శర్మ (71) అద్భుత హాఫ్ సెంచరీతో చెలరేగగా, చివర్లో శివమ్ దూబే (32*) దూకుడైన ఇన్నింగ్స్ ఆడాడు. దీంతో లక్నో ముందు 188 పరుగుల లక్ష్యాన్ని ఉంచింది.

లక్నోలోని ఏకనా స్టేడియంలో టాస్ గెలిచిన లక్నో కెప్టెన్ ఫీల్డింగ్ ఎంచుకున్నాడు. బ్యాటింగ్ ప్రారంభించిన చెన్నైకి ఆదిలోనే గట్టి ఎదురుదెబ్బ తగిలింది. లక్నో బౌలర్ ఆకాశ్ సింగ్ తన అద్భుత బౌలింగ్‌తో చెన్నై టాప్ ఆర్డర్‌ను కుప్పకూల్చాడు. కెప్టెన్ రుతురాజ్ గైక్వాడ్ (13), సంజూ శాంసన్ (20), ఉర్విల్ పటేల్ (6) వికెట్లను పడగొట్టి సీఎస్‌కేను కష్టాల్లోకి నెట్టాడు.

ఈ దశలో కార్తీక్ శర్మ, డివాల్డ్ బ్రెవిస్ (25)తో కలిసి ఇన్నింగ్స్‌ను చక్కదిద్దాడు. ముఖ్యంగా కార్తీక్ శర్మ అద్భుతంగా ఆడి కేవలం 42 బంతుల్లో 6 ఫోర్లు, 5 సిక్సర్లతో 71 పరుగులు చేశాడు. అతను ఔటైన తర్వాత క్రీజులోకి వచ్చిన శివమ్ దూబే తనదైన శైలిలో రెచ్చిపోయాడు. కేవలం 16 బంతుల్లో 3 ఫోర్లు, 2 సిక్సర్లతో 32 పరుగులు చేసి అజేయంగా నిలిచాడు. దీంతో చెన్నై భారీ స్కోరు చేయగలిగింది. లక్నో బౌలర్లలో ఆకాశ్ సింగ్ 4 ఓవర్లలో 26 పరుగులిచ్చి 3 వికెట్లు పడగొట్టగా.. షమీ, షాబాజ్ అహ్మద్ చెరో వికెట్ తీసుకున్నారు.