'ఏఐ' ఎఫెక్ట్... స్టాక్ మార్కెట్లకు భారీ నష్టాలు

భారత ఈక్విటీ మార్కెట్లు వరుసగా రెండో రోజు కూడా భారీ నష్టాల్లో ముగిశాయి. శుక్రవారం ట్రేడింగ్‌లో అమ్మకాల సునామీ వెల్లువెత్తడంతో సూచీలు కుప్పకూలాయి. ఆర్టిఫిషియల్ ఇంటెలిజెన్స్ (ఏఐ) కారణంగా భారత ఔట్‌సోర్సింగ్ మోడల్‌కు ముప్పు వాటిల్లుతుందనే అంతర్జాతీయ ఆందోళనలు ఇన్వెస్టర్ల సెంటిమెంట్‌ను తీవ్రంగా దెబ్బతీశాయి.

ట్రేడింగ్ ముగిసే సమయానికి బీఎస్ఈ సెన్సెక్స్ 1,048 పాయింట్లు నష్టపోయి 82,626 వద్ద స్థిరపడింది. ఎన్ఎస్ఈ నిఫ్టీ 336 పాయింట్లు పతనమై 25,471 వద్ద ముగిసింది. బెంచ్‌మార్క్ సూచీలతో పాటు మిడ్‌క్యాప్, స్మాల్‌క్యాప్ షేర్లలోనూ అమ్మకాల ఒత్తిడి కనిపించింది. నిఫ్టీ మిడ్‌క్యాప్ 100 ఇండెక్స్ 1.71 శాతం పడిపోగా, స్మాల్‌క్యాప్ 100 ఇండెక్స్ 1.79 శాతం మేర క్షీణించింది.

రంగాల వారీగా చూస్తే అన్ని సూచీలు నష్టాల్లోనే ముగిశాయి. ముఖ్యంగా నిఫ్టీ మెటల్ ఇండెక్స్ 3.31 శాతం పతనమై టాప్ లూజర్‌గా నిలిచింది. రియల్టీ, ఐటీ, ఎఫ్‌ఎంసీజీ రంగాలు కూడా భారీ నష్టాలను చవిచూశాయి. నిఫ్టీ 50లోని 44 షేర్లు నష్టాల్లో ముగియడం మార్కెట్ బలహీనతను సూచిస్తోంది. డాలర్‌తో రూపాయి మారకం విలువ 6 పైసలు బలహీనపడి 90.61 వద్ద ట్రేడ్ అయింది.

సాంకేతికంగా నిఫ్టీ తన కీలకమైన 21, 50, 100-రోజుల చలన సగటుల దిగువకు పడిపోయిందని విశ్లేషకులు తెలిపారు. "బ్యాంక్ నిఫ్టీ స్వల్పకాలిక కన్సాలిడేషన్ రేంజ్ నుంచి కిందకి జారింది. ఇది స్వల్ప లాభాల స్వీకరణను సూచిస్తుంది. అయితే, 59,700 వద్ద ఉన్న 20-రోజుల చలన సగటు కీలక మద్దతుగా కొనసాగుతోంది" అని ఎల్కేపీ సెక్యూరిటీస్ టెక్నికల్ అనలిస్ట్ వత్సల్ భువా వివరించారు.