హైదరాబాద్ పోలీసులకు థ్యాంక్స్ చెప్పిన అమెరికన్‌ సీఈఓ.. ఎందుకంటే..!

అమెరికాకు చెందిన కాయిన్ బేస్ సంస్థ సీఈఓ బ్రియాన్ ఆర్మ్ స్ట్రాంగ్ హైదరాబాద్ పోలీసులకు కృతజ్ఞతలు తెలిపారు. సైబర్ దుండగులను చాకచక్యంగా అరెస్టు చేశారంటూ ప్రశంసలు గుప్పించారు. ఈ మేరకు ఆయన తన ఎక్స్ ఖాతాలో ఓ పోస్టు పెట్టారు. సైబర్ దుండగుల విషయంలో తమ కంపెనీ ‘జీరో టాలరెన్స్’ విధానం పాటిస్తుందని ఆయన చెప్పారు.

అసలు ఏం జరిగిందంటే..
కాయిన్‌ బేస్‌ సంస్థ క్రిప్టో కరెన్సీకి సంబంధించిన కార్యకలాపాలు నిర్వహిస్తుంది. ఈ సంస్థపై ఇటీవల హ్యాకర్లు దాడి చేశారు. సంస్థకు చెందిన కస్టమర్ల డేటాను దొంగిలించి, 20 మిలియన్ డాలర్లను డిమాండ్ చేశారు. హ్యాకర్లకు సహకరించిన ఆ ఏజెంట్ భారతీయుడని బ్రియాన్ తన పోస్టులో పేర్కొన్నారు.

తాజాగా ఆ నిందితుడిని హైదరాబాద్ పోలీసులు అరెస్టు చేశారని చెబుతూ.. మన పోలీసులకు ఆయన కృతజ్ఞతలు తెలిపారు. ‘హైదాబాద్ పోలీసులకు ధన్యవాదాలు. హ్యాకర్లకు సహకరించిన మిగతా వారికి కూడా ఇదే పరిస్థితి రానుంది’ అని బ్రియాన్‌ ఆర్మ్‌స్ట్రాంగ్‌ పేర్కొన్నారు.