రన్నింగ్ ట్రైన్‌లో విద్యార్థినితో అసభ్య ప్రవర్తన.. హెడ్ కానిస్టేబుల్ అరెస్ట్

చెన్నై నుంచి కోయంబత్తూర్ వెళుతున్న రైలులో ఓ లా విద్యార్థినిపై తమిళనాడుకు చెందిన హెడ్ కానిస్టేబుల్ లైంగిక వేధింపులకు పాల్పడిన ఘటన తీవ్ర కలకలం రేపింది. ప్రయాణికుడిగా ఉన్న ఆ పోలీసు తనతో అసభ్యంగా ప్రవర్తించాడని బాధితురాలు ఆరోపించింది. ఈ ఘటన రాష్ట్రంలో మహిళల భద్రతపై మరోసారి తీవ్ర ఆందోళనలకు దారితీసింది.

బాధిత విద్యార్థిని అత్యంత ధైర్యంగా ఆ పోలీసు దుశ్చర్యను తన మొబైల్ ఫోన్‌లో వీడియో తీసింది. రైలు ప్రయాణంలో ఉండగానే ఆ వీడియోను రైల్వే పోలీసు ఫోర్స్ (RPF)కు పంపింది. ఆమె ఫిర్యాదు, వీడియో ఆధారంగా పోలీసులు వెంటనే స్పందించారు. రైలు కాట్పాడి జంక్షన్‌కు చేరుకోగానే నిందితుడైన పోలీసును అదుపులోకి తీసుకుని కేసు నమోదు చేశారు.

ఈ ఘటనపై కోయంబత్తూర్ నగర పోలీస్ శాఖ తీవ్రంగా స్పందించింది. ఆర్‌ఎస్‌ పురం పోలీస్ స్టేషన్‌కు చెందిన సదరు హెడ్ కానిస్టేబుల్‌ను విచారణ పూర్తయ్యే వరకు సస్పెండ్ చేస్తున్నట్లు ప్రకటించింది. "ప్రస్తుతం ఈ కేసు కాట్పాడి రైల్వే పోలీసుల వద్ద ఉంది. వారు విచారణ జరిపి చట్ట ప్రకారం చర్యలు తీసుకుంటారు" అని ఓ సీనియర్ పోలీసు అధికారి ఎన్డీటీవీకి తెలిపారు. ఆరోపణలు రుజువైతే కఠినమైన క్రమశిక్షణా చర్యలు తప్పవని అధికారులు స్పష్టం చేశారు.