అమితాబ్ బచ్చన్ భార్య కాబట్టే ప్రజలు భరిస్తున్నారు: కంగనా రనౌత్

బాలీవుడ్‌లో ఫైర్‌బ్రాండ్‌గా పేరున్న నటి, బీజేపీ ఎంపీ కంగనా రనౌత్ మరోసారి వార్తల్లో నిలిచారు. ఈసారి ఆమె సీనియర్ నటి, సమాజ్ వాదీ పార్టీ ఎంపీ జయా బచ్చన్ ప్రవర్తనను టార్గెట్ చేస్తూ సోషల్ మీడియాలో పోస్ట్ పెట్టారు. ఓ కార్యక్రమంలో ఒక వ్యక్తి పట్ల జయా బచ్చన్ ప్రవర్తించిన తీరుపై ఆమె తీవ్రంగా స్పందించారు.

ఇటీవల ఓ కార్యక్రమానికి హాజరైన జయా బచ్చన్... తనతో సెల్ఫీ తీసుకుంటున్న వ్యక్తిని పక్కకు నెట్టేస్తున్నట్లుగా ఉన్న ఓ వీడియో సోషల్ మీడియాలో వైరల్‌గా మారింది. గతంలో కూడా మీడియా ప్రతినిధులపై, ఫొటోగ్రాఫర్లపై జయా బచ్చన్ పలుమార్లు ఆగ్రహం వ్యక్తం చేసిన సంగతి తెలిసిందే. అయితే, తాజా వీడియోతో ఆమె ప్రవర్తన మరోసారి చర్చనీయాంశమైంది.

ఈ వీడియోను తన ఇన్‌స్టాగ్రామ్ స్టోరీలో షేర్ చేసిన కంగన... జయపై విమర్శలు గుప్పించారు. జయ స్టార్ యాక్టర్ అమితాబ్ బచ్చన్ భార్య కాబట్టి ఆమెను కోపతాపాలను ప్రజలు భరిస్తున్నారని అన్నారు. 

కంగనా పోస్ట్‌తో ఈ వివాదం మరింత పెద్దదైంది. జయా బచ్చన్ ప్రవర్తనను కొందరు నెటిజన్లు తప్పుబడుతుండగా, ఆమె వ్యక్తిగత స్వేచ్ఛకు భంగం కలిగించడం సరికాదని మరికొందరు మద్దతుగా నిలుస్తున్నారు. మొత్తానికి, కంగనా రనౌత్ చేసిన వ్యాఖ్యలతో బాలీవుడ్‌లో ఈ అంశం మరోసారి హాట్ టాపిక్‌గా మారింది. ఆమె అత్యంత విశేషాధికారాలు కలిగిన మహిళ అని ఎద్దేవా చేశారు. జయ ప్రవర్తించిన తీరు అవమానకరం, సిగ్గుచేటని అన్నారు.