'బంగారు కుటుంబాల'కు అండగా 'మార్గదర్శులు': పీ4పై సీఎం చంద్రబాబు ప్రత్యేక దృష్టి

రాష్ట్రంలో పేదరికాన్ని పూర్తిగా నిర్మూలించాలనే లక్ష్యంతో ప్రభుత్వం ప్రతిష్ఠాత్మకంగా చేపట్టిన పీ4 (ప్రజల భాగస్వామ్యంతో పేదరిక నిర్మూలన) కార్యక్రమం అమలు తీరుపై ముఖ్యమంత్రి నారా చంద్రబాబు నాయుడు బుధవారం సమీక్ష నిర్వహించారు. ఈ కార్యక్రమంలో భాగంగా 'మార్గదర్శుల' గుర్తింపు, 'బంగారు కుటుంబాల' ఎంపిక వంటి కీలక అంశాలపై ఆయన ప్రధానంగా దృష్టి సారించారు.

పీ4 విధానం ద్వారా అర్హులైన పేద కుటుంబాలకు చేయూత అందించేందుకు రాష్ట్రవ్యాప్తంగా మొత్తం 19,15,771 'బంగారు కుటుంబాల'ను గుర్తించినట్లు అధికారులు ముఖ్యమంత్రికి వివరించారు. వీరిలో ఇప్పటివరకు 87,395 కుటుంబాలను 'మార్గదర్శులు' (స్వచ్ఛందంగా సహాయం చేసే వ్యక్తులు) దత్తత తీసుకున్నారని తెలిపారు. ఈ సందర్భంగా ముఖ్యమంత్రి మాట్లాడుతూ, సమాజంలో చాలా మంది వివిధ రూపాల్లో పేదలకు సాయం చేయడానికి ఆసక్తి చూపుతున్నారని, అటువంటి వారికి పీ4 కార్యక్రమాన్ని ఒక మంచి వేదికగా మార్చాలని అన్నారు. 'మార్గదర్శులు'గా ఉండటానికి ముందుకు వచ్చేవారిని సంప్రదించి, వారిని 'బంగారు కుటుంబాల'తో అనుసంధానించే ప్రక్రియపై మరింత శ్రద్ధ పెట్టాలని అధికారులకు సూచించారు.

ఈ కార్యక్రమం అమలును నిరంతరం పర్యవేక్షించేందుకు ప్రత్యేకంగా ఒక కాల్ సెంటర్‌ను ప్రభుత్వం ఏర్పాటు చేసిందని ముఖ్యమంత్రి వెల్లడించారు. 'మార్గదర్శులు'గా ఉండాలనుకునే వారికి అవసరమైన సమాచారం, మార్గనిర్దేశం అందించేలా వ్యవస్థలను పటిష్టం చేయాలని ఆదేశించారు. 'మార్గదర్శుల'తో 'బంగారు కుటుంబాల'ను అనుసంధానించిన తర్వాత, వారి జీవన ప్రమాణాల్లో వచ్చిన మార్పులను అంచనా వేయడానికి ప్రత్యేక సర్వేలు నిర్వహించాలని సూచించారు. కార్యక్రమం అమలులో పారదర్శకత కోసం తప్పనిసరిగా ఆడిటింగ్ నిర్వహించాలని, ప్రతి మూడు నెలలకు ఒకసారి సమీక్ష జరపాలని, పీ4 కార్యక్రమ ప్రభావాన్ని నివేదికల రూపంలో ఎప్పటికప్పుడు 'మార్గదర్శకుల'కు కూడా తెలియజేయాలని స్పష్టం చేశారు.

పీ4 కార్యక్రమ లక్ష్యాలను వివరిస్తూ, పారిశ్రామికవేత్తలు, ఎన్నారైలు, ప్రముఖులు, ఉన్నత వర్గాల వారితో ప్రత్యేక కార్యక్రమాలు నిర్వహించి, వారిని 'మార్గదర్శులు'గా మారేందుకు ఆహ్వానించాలని ముఖ్యమంత్రి సూచించారు. ఈ కార్యక్రమంలో 'మార్గదర్శుల' భాగస్వామ్యం పెంచేందుకు దేశంలోని ప్రముఖ 100 కంపెనీలకు చెందిన సీఈఓలు, సీవోవోలు, సీఎఫ్‌ఓలు, ఎండీలు, ఛైర్మన్‌లతో తానే స్వయంగా మాట్లాడి పిలుపునిస్తానని చంద్రబాబు నాయుడు తెలిపారు.

అంతేకాకుండా, దేశవిదేశాల్లో ఉన్న తెలుగువారితో వర్చువల్ విధానంలో సమావేశమై, ఈ కార్యక్రమ ప్రాముఖ్యతను, ప్రభుత్వ లక్ష్యాన్ని వివరించి, వారిని 'మార్గదర్శులు'గా ముందుకు వచ్చేలా ప్రోత్సహిస్తానని అన్నారు. ఎన్నారైలను పీ4 కార్యక్రమానికి సలహాదారులుగా నియమించి, తద్వారా మరింత మంది ఎన్నారైలు 'మార్గదర్శకులు'గా చేరేలా ప్రోత్సహించాలనే ఆలోచన ఉందని ముఖ్యమంత్రి పేర్కొన్నారు.

ఈ సమీక్షలో భాగంగా, జీరో పావర్టీ, పీ4 కాన్సెప్ట్‌ను ప్రజల్లోకి బలంగా తీసుకెళ్లేందుకు రూపొందించిన పలు లోగోలను ముఖ్యమంత్రి పరిశీలించారు. త్వరలోనే ఒక లోగోను ఖరారు చేయనున్నట్లు తెలిపారు. పీ4 కార్యక్రమాన్ని ప్రారంభించిన మార్చి 30వ తేదీని ఏటా 'పీ4 వార్షికోత్సవం'గా నిర్వహించి, సాధించిన విజయాలను ప్రజలకు వివరించాలని ఆయన సూచించారు. అమరావతిలోని క్యాంప్ కార్యాలయంలో జరిగిన ఈ సమీక్షా సమావేశంలో రాష్ట్ర ఆర్థిక శాఖ మంత్రి పయ్యావుల కేశవ్, ఆర్థిక, ప్రణాళికా శాఖలకు చెందిన ఉన్నతాధికారులు పాల్గొన్నారు.