సూర్యకుమార్ వీరబాదుడు.. ఢిల్లీ ముందు 181 పరుగుల లక్ష్యం

ముంబైలోని వాంఖడే స్టేడియంలో ఢిల్లీ క్యాపిటల్స్‌తో జరుగుతున్న మ్యాచ్‌లో ముంబై ఇండియన్స్ నిర్ణీత 20 ఓవర్లలో 5 వికెట్ల నష్టానికి 180 పరుగులు చేసింది. ముంబై బ్యాటర్లలో స్టార్ ఆటగాడు సూర్యకుమార్ యాదవ్ (73 నాటౌట్; 43 బంతుల్లో 7 ఫోర్లు, 4 సిక్సర్లు) అద్భుత అర్ధశతకంతో చెలరేగగా, చివర్లో నమన్ ధీర్ (24 నాటౌట్; 8 బంతుల్లో 2 ఫోర్లు, 2 సిక్సర్లు) మెరుపు ఇన్నింగ్స్ ఆడాడు.

ఈ మ్యాచ్‌లో టాస్ గెలిచిన ఢిల్లీ క్యాపిటల్స్ తొలుత బౌలింగ్ ఎంచుకుంది. దాంతో మొదట బ్యాటింగ్‌కు దిగిన ముంబై ఇండియన్స్‌కు ఆరంభంలోనే ఎదురుదెబ్బ తగిలింది. రోహిత్ శర్మ (5) మరోసారి నిరాశపరిచాడు. ముస్తాఫిజుర్ బౌలింగ్‌లో అబిషేక్ పోరెల్‌కు క్యాచ్ ఇచ్చి వెనుదిరిగాడు. ఆ తర్వాత వచ్చిన విల్ జాక్స్ (21; 13 బంతుల్లో 3 ఫోర్లు, 1 సిక్సర్) దూకుడుగా ఆడే ప్రయత్నం చేసినా, ముఖేష్ కుమార్ బౌలింగ్‌లో విప్రాజ్ నిగమ్‌కు చిక్కాడు. కాసేపటికే రియాన్ రికెల్టన్ (25; 18 బంతుల్లో 2 సిక్సర్లు) కుల్దీప్ యాదవ్ బౌలింగ్‌లో మాధవ్ తివారీకి క్యాచ్ ఇచ్చి ఔటయ్యాడు.

ఈ దశలో క్రీజులోకి వచ్చిన సూర్యకుమార్ యాదవ్, తిలక్ వర్మ (27; 27 బంతుల్లో 1 ఫోర్, 1 సిక్సర్)తో కలిసి ఇన్నింగ్స్‌ను చక్కదిద్దే ప్రయత్నం చేశాడు. వీరిద్దరూ నాలుగో వికెట్‌కు కీలక భాగస్వామ్యం నెలకొల్పారు. అయితే, ముఖేష్ కుమార్ బౌలింగ్‌లో తిలక్ వర్మ, సమీర్ రిజ్వీకి క్యాచ్ ఇచ్చి పెవిలియన్ చేరాడు. కెప్టెన్ హార్దిక్ పాండ్యా (3) కూడా చమీర బౌలింగ్‌లో ముఖేష్ కుమార్‌కు క్యాచ్ ఇచ్చి నిరాశపరిచాడు.

ఒకవైపు వికెట్లు పడుతున్నా, సూర్యకుమార్ యాదవ్ మాత్రం అద్భుతంగా ఆడాడు. మైదానం నలువైపులా షాట్లు కొడుతూ స్కోరు బోర్డును పరుగులు పెట్టించాడు. అతనికి చివరి ఓవర్లలో నమన్ ధీర్ తోడవడంతో ముంబై భారీ స్కోరు చేయగలిగింది. నమన్ ధీర్ తనదైన శైలిలో సిక్సర్లు, ఫోర్లతో అలరించాడు. 

ఢిల్లీ క్యాపిటల్స్ బౌలర్లలో ముఖేష్ కుమార్ రెండు వికెట్లు పడగొట్టగా, కుల్దీప్ యాదవ్, ముస్తాఫిజుర్ రెహ్మాన్, దుష్మంత చమీర తలో వికెట్ దక్కించుకున్నారు. కుల్దీప్ యాదవ్ పొదుపుగా బౌలింగ్ చేసి 4 ఓవర్లలో కేవలం 22 పరుగులిచ్చి ఒక వికెట్ తీశాడు. ముఖేష్ కుమార్ 4 ఓవర్లలో 48 పరుగులు ఇవ్వగా, చమీర 4 ఓవర్లలో 54 పరుగులు సమర్పించుకున్నాడు.