Telangana Government: సరిహద్దులో ఉద్రిక్తత... తెలంగాణ పౌరులకు ఢిల్లీలో హెల్ప్ లైన్
- ఢిల్లీలోని తెలంగాణ భవన్‌లో కంట్రోల్ రూమ్ ఏర్పాటు
- సరిహద్దు రాష్ట్రాల్లోని తెలంగాణ వాసులకు సహాయం, సమాచారం
- సంప్రదించాల్సిన ఫోన్ నంబర్లు విడుదల
భారత్, పాకిస్థాన్ మధ్య సరిహద్దు ప్రాంతాల్లో నెలకొన్న ఉద్రిక్త పరిస్థితుల నేపథ్యంలో తెలంగాణ ప్రభుత్వం ఢిల్లీలో కీలక చర్యలు చేపట్టింది. సరిహద్దు రాష్ట్రాలలో నివసిస్తున్న లేదా అక్కడ చిక్కుకుపోయిన తెలంగాణ పౌరులకు అండగా నిలిచేందుకు దేశ రాజధానిలోని తెలంగాణ భవన్‌లో ప్రత్యేక కంట్రోల్ రూమ్‌ను యుద్ధప్రాతిపదికన ఏర్పాటు చేసింది.
సరిహద్దులకు సమీపంలోని రాష్ట్రాలలో నివసిస్తున్న లేదా వివిధ కారణాల వల్ల అక్కడ చిక్కుకుపోయిన తెలంగాణ ప్రజలకు తక్షణ సహాయం అందించడం, వారికి అవసరమైన సమాచారం చేరవేయడం, ఇతర అత్యవసర సేవలను అందుబాటులోకి తేవడం ఈ కంట్రోల్ రూమ్ ముఖ్య ఉద్దేశమని ఒక ప్రకటనలో తెలిపారు. ఎలాంటి ఆపదలో ఉన్నా, ఏ సమాచారం కావాలన్నా నిర్భయంగా ఈ కంట్రోల్ రూమ్‌ను సంప్రదించాలని తెలంగాణ ప్రభుత్వం సూచించింది.
సహాయం కోసం ప్రధాన కంట్రోల్ రూమ్ నంబర్‌ 011-23380556 ను సంప్రదించాలని అధికారులు తెలిపారు. దీనితో పాటు, మరింత మెరుగైన సేవలందించేందుకు, సులభంగా అధికారులను సంప్రదించేందుకు మరికొన్ని ఫోన్ నంబర్లను కూడా అందుబాటులో ఉంచారు. రెసిడెంట్‌ కమిషనర్ ప్రైవేటు సెక్రటరీ (లైజన్‌ హెడ్‌): 98719-99044, రెసిడెంట్‌ కమిషనర్ వ్యక్తిగత సహాయకుడు: 99713-87500, తెలంగాణ భవన్‌ లైజన్‌ ఆఫీసర్‌: 96437-23157, పబ్లిక్‌ రిలేషన్‌ ఆఫీసర్‌ (పీఆర్వో): 99493-51270ను సంప్రదించాలని ప్రకటనలో పేర్కొన్నారు.
