Donald Trump: ట్రంప్ 'విలీనం' వ్యాఖ్యల మధ్య కెనడాలో ఎన్నికల పోలింగ్
- ట్రంప్ 'విలీనం' బెదిరింపుల మధ్య కెనడాలో ఎన్నికలు
- ట్రంప్ జోక్యాన్ని తిప్పికొట్టిన కన్సర్వేటివ్ నేత పైలీవర్
- అమెరికా ఒత్తిడిని ఎదుర్కొనేందుకు కార్నీ వ్యూహం
- లిబరల్, కన్సర్వేటివ్ పార్టీల మధ్య తీవ్ర పోటీ
అమెరికా అధ్యక్షుడు డోనాల్డ్ ట్రంప్ కెనడాను అమెరికాలో విలీనం చేసుకోవాలంటూ సంచలన వ్యాఖ్యలు చేస్తున్న నేపథ్యంలో, కెనడాలో కీలకమైన సాధారణ ఎన్నికల పోలింగ్ జరుగుతోంది. దేశ భవిష్యత్తును నిర్దేశించే ఈ ఎన్నికలపై ట్రంప్ చేసిన వ్యాఖ్యలు తీవ్ర ప్రభావం చూపుతున్నాయి.
కెనడాను అమెరికాలో 51వ రాష్ట్రంగా మార్చాలని తాను కోరుకుంటున్నట్లు ట్రంప్ తన సోషల్ మీడియా వేదిక 'ట్రూత్ సోషల్' లో పోస్టులు చేశారు. ఇలా చేయడం వల్ల సుంకాలు సున్నాకి పడిపోతాయని, సరిహద్దులు లేని స్వేచ్ఛా వాణిజ్యం సాధ్యమవుతుందని ఆయన పేర్కొన్నారు. "ఎన్నో ఏళ్ల క్రితం గీసిన కృత్రిమ రేఖ ఇక వద్దు. ఈ భూభాగం ఎంత అందంగా ఉంటుందో చూడండి... అన్నీ సానుకూలతలే, ప్రతికూలతలు లేవు. ఇది జరగాల్సిందే!" అని ట్రంప్ వ్యాఖ్యానించారు. కెనడాను ఏటా వందల బిలియన్ డాలర్లతో తాము పోషించలేమని, అది అమెరికాలో ఒక రాష్ట్రంగా మారితే తప్ప ఇది సాధ్యం కాదని ఆయన వాదించారు.
ట్రంప్ జోక్యంపై కెనడాలోని ప్రధాన పార్టీల నేతలు తీవ్రంగా స్పందించారు. కన్సర్వేటివ్ పార్టీ నాయకుడు పియర్ పైలీవర్, "అధ్యక్ష ట్రంప్, మా ఎన్నికల జోలికి రావద్దు. కెనడా భవిష్యత్తును నిర్ణయించేది కేవలం కెనడియన్లు మాత్రమే. కెనడా ఎల్లప్పుడూ గర్వంగా, సార్వభౌమంగా, స్వతంత్రంగా ఉంటుంది. మేము ఎప్పటికీ 51వ రాష్ట్రం కాబోము" అని 'X' వేదికగా స్పష్టం చేశారు.
మరోవైపు, లిబరల్ పార్టీ నేత, మాజీ సెంట్రల్ బ్యాంక్ గవర్నర్ మార్క్ కార్నీ, ట్రంప్ దూకుడును ఎదుర్కోవడానికి తన అంతర్జాతీయ ఆర్థిక అనుభవం ఉపయోగపడుతుందని తెలిపారు. అమెరికాపై ఆధారపడటాన్ని తగ్గించేందుకు అంతర్గత వాణిజ్యాన్ని పెంపొందించడంతో పాటు, విదేశాల్లో ఆర్థిక అవకాశాలను విస్తరింపజేస్తామని ఆయన హామీ ఇచ్చారు. ట్రంప్ నాయకత్వంలోని అమెరికా కెనడాను విచ్ఛిన్నం చేసి, తమ అధీనంలోకి తెచ్చుకోవాలని చూస్తోందని కార్నీ హెచ్చరించారు.
ఈ ఎన్నికల్లో ప్రధానంగా లిబరల్ పార్టీ (కార్నీ), కన్సర్వేటివ్ పార్టీ (పైలీవర్) మధ్యే పోటీ నెలకొంది. మొత్తం 343 పార్లమెంటు స్థానాలకు గాను, మెజారిటీ సాధించాలంటే 172 సీట్లు గెలవాల్సి ఉంటుంది. ఇప్పటికే రికార్డు స్థాయిలో 7.3 మిలియన్ల మంది ముందస్తుగా తమ ఓటు హక్కును వినియోగించుకున్నారు.
