Shahid Afridi: భారత సైన్యాన్ని కించపరిచేలా పాకిస్థాన్ క్రికెట్ మాజీ కెప్టెన్ షాహిద్ ఆఫ్రిది వ్యాఖ్యలు
- పహల్గామ్ ఉగ్రదాడి నేపథ్యంలో షాహిద్ ఆఫ్రిది వివాదాస్పద వ్యాఖ్యలు
- చిన్న ఘటన జరిగినా పాకిస్థాన్ ను భారత్ నిందిస్తోందని విమర్శ
- కశ్మీర్ లో భారీ సైన్యం ఉన్నప్పటికీ దాడి జరిగిందంటూ మన ఆర్మీ సామర్థ్యాన్ని ప్రశ్నించిన వైనం
పాకిస్థాన్ మాజీ క్రికెట్ కెప్టెన్ షాహిద్ అఫ్రిది మరోసారి వివాదాస్పద వ్యాఖ్యలతో వార్తల్లో నిలిచాడు. ఇటీవల జమ్మూకశ్మీర్‌లోని పహల్గామ్‌లో పర్యాటకులపై జరిగిన ఉగ్రదాడి ఘటనపై స్పందిస్తూ.. భారత సైన్యాన్ని కించపరిచేలా మాట్లాడాడు. తమ దేశ వైఫల్యాలను కప్పిపుచ్చుకోవడానికే భారత్ ఎప్పుడూ పాకిస్థాన్‌పై నిందలు వేస్తుందని ఆరోపించాడు.
ఓ టెలివిజన్ కార్యక్రమంలో పాల్గొన్న అఫ్రిది, పహల్గామ్ ఉగ్రదాడి ఘటనను ప్రస్తావిస్తూ తీవ్ర వ్యాఖ్యలు చేశాడు. "భారత్‌లో చిన్న పటాకా పేలినా సరే, వారు వెంటనే పాకిస్థాన్‌ను నిందిస్తారు. కశ్మీర్‌లో 8 లక్షల మంది సైన్యం ఉందని గొప్పలు చెప్పుకుంటారు. ఇంత పటిష్టమైన భద్రత ఉన్నప్పుడు పర్యాటకులపై దాడి ఎలా జరిగింది? దీనర్థం మీరంతా (భారత సైన్యం) అసమర్థులని కాదా? ప్రజలకు కనీస భద్రత కల్పించడంలో కూడా మీరు విఫలమయ్యారు" అని అఫ్రిది విమర్శించాడు.
ఘటన జరిగిన గంటలోనే భారత మీడియా మొత్తం పాకిస్థాన్‌ను దోషిగా చిత్రీకరించిందని, విద్యావంతులమని చెప్పుకునే కొందరు భారత మాజీ క్రికెటర్లు కూడా ఆధారాలు లేకుండా పాక్‌పై ఆరోపణలు చేస్తున్నారని అన్నారు. "దమ్ముంటే ఆధారాలతో నిరూపించాలి" అని అఫ్రిది సవాల్ విసిరాడు.
అయితే, పాకిస్థాన్ మాజీ హిందూ క్రికెటర్ డానిష్ కనేరియా మాత్రం అఫ్రిది వాదనకు భిన్నంగా స్పందించాడు. పహల్గామ్ దాడిని పాకిస్థాన్ ప్రభుత్వం వెంటనే ఖండించకపోవడంపై ఆయన అనుమానాలు వ్యక్తం చేశాడు. ఉగ్రవాదులను స్వాతంత్ర్య సమరయోధులతో పోలుస్తూ పాక్ ఉప ప్రధాని చేసిన వ్యాఖ్యలను కనేరియా తీవ్రంగా తప్పుబట్టాడు. ఉగ్రవాదాన్ని తామే ప్రోత్సహిస్తున్నామని పాక్ నేతలు పరోక్షంగా అంగీకరించినట్లే ఉందని ఆయన మండిపడ్డారు.
మరోవైపు, పహల్గామ్ ఉగ్రదాడిని భారత క్రీడాలోకం ముక్తకంఠంతో ఖండించింది. సచిన్ టెండూల్కర్, విరాట్ కోహ్లీ, రోహిత్ శర్మ వంటి దిగ్గజాలు సోషల్ మీడియా వేదికగా దాడిని తీవ్రంగా ఖండించారు. బాధితుల కుటుంబాలకు ప్రగాఢ సానుభూతి తెలిపారు. దోషులను కఠినంగా శిక్షించాలని భారత ప్రభుత్వాన్ని కోరారు. బీసీసీఐ మాజీ అధ్యక్షుడు సౌరవ్ గంగూలీ స్పందిస్తూ.. పాకిస్థాన్‌తో క్రికెట్ సంబంధాలను పూర్తిగా తెంచుకోవాలని సూచించాడు. ఉగ్రవాదాన్ని ఉక్కుపాదంతో అణచివేయాలని ఆయన ప్రభుత్వానికి విజ్ఞప్తి చేశాడు.
