ఐపీఎల్ క్వాలిఫయర్-1కు సర్వం సిద్ధం... ఫైనల్ కు జంప్ చేసేది ఎవరో?

ఐపీఎల్ 16వ సీజన్ లో నేటి నుంచి ప్లే ఆఫ్ మ్యాచ్ లు జరగనున్నాయి. పాయింట్ల పట్టికలో తొలి రెండు స్థానాల్లో నిలిచిన గుజరాత్ టైటాన్స్, చెన్నై సూపర్ కింగ్స్ నేటి క్వాలిఫయర్-1లో తలపడుతున్నాయి. 

ఈ మ్యాచ్ కు చెన్నైలోని ఎంఏ చిదంబరం స్టేడియం వేదికగా నిలుస్తోంది. టాస్ గెలిచిన గుజరాత్ టైటాన్స్ బౌలింగ్ ఎంచుకుంది. గతేడాది ఐపీఎల్ టైటిల్ నెగ్గిన గుజరాత్ టైటాన్స్ ఈ మ్యాచ్ ను నెగ్గి ఫైనల్ చేరడమే కాకుండా, మరోసారి టైటిల్ గెలవాలని కృతనిశ్చయంతో ఉంది. 

ఈ మ్యాచ్ కోసం గుజరాత్ జట్టులో ఒక మార్పు చేశారు. యశ్ దయాళ్ స్థానంలో దర్శన్ నల్కండేను జట్టులోకి తీసుకున్నారు. అటు, సీఎస్కే జట్టులో ఎలాంటి మార్పులు లేవని కెప్టెన్ ధోనీ వెల్లడించాడు. కాగా, ఈ క్వాలిఫయర్-1 మ్యాచ్ లో నెగ్గిన జట్టు నేరుగా ఫైనల్లోకి అడుగుపెడుతుంది. ఓడిన జట్టు క్వాలిఫయర్-2లో ఎలిమినేటర్ మ్యాచ్ విజేతతో తలపడాల్సి ఉంటుంది.