Rashmika Mandanna: తమిళంలో రష్మికకు మరో సినిమా!

ప్రస్తుతం టాలీవుడ్ లో వరుస విజయాలతో దూసుకుపోతున్న హాట్ కథానాయిక రష్మిక. స్టార్ హీరోల సరసన నటిస్తూ అగ్రశ్రేణి కథానాయికల జాబితాలోకి అనతికాలంలోనే చేరిపోయింది. ప్రస్తుతం తెలుగులో 'పుష్ప', 'ఆడాళ్లూ మీకు జోహార్లు' సినిమాలలో నటిస్తున్న ఈ కన్నడ భామ అటు తమిళంలో కూడా ఇటీవలే కాలుమోపింది.

కార్తీ హీరోగా బక్కియరాజ్ దర్శకత్వంలో రూపొందుతున్న 'సుల్తాన్' చిత్రం ద్వారా కోలీవుడ్ లో ప్రవేశించింది. ఇటీవలే షూటింగును పూర్తిచేసుకున్న ఈ చిత్రం పోస్ట్ ప్రొడక్షన్ పనులు ప్రస్తుతం జరుగుతున్నాయి. ఇదిలావుంచితే, ఈ సినిమా విడుదల కాకుండానే కార్తీ సోదరుడు సూర్య సరసన నటించే లక్కీ ఛాన్స్ ను ఈ ముద్దుగుమ్మ పొందినట్టు తెలుస్తోంది.

తాజాగా 'ఆకాశం నీ హద్దురా' చిత్రంతో మంచి విజయాన్ని అందుకున్న స్టార్ హీరో సూర్య త్వరలో పాండియరాజ్ దర్శకత్వంలో ఓ సినిమా చేయనున్నాడు. యాక్షన్ ఎంటర్ టైనర్ కథాంశంతో రూపొందే ఈ చిత్రంలో కథానాయిక పాత్రకు తాజాగా రష్మికను ఎంచుకున్నట్టు సమాచారం. ఇక కన్నడలో సినిమాలు చేస్తూనే, ఇటు తెలుగు, తమిళ భాషలలో కూడా సినిమాలు కొనసాగించాలన్నది రష్మిక ఆలోచనగా కనిపిస్తోంది.