గర్భిణుల ఆశలపై నీళ్లు చల్లేందుకు ట్రంప్ ప్రభుత్వం రెడీ!

గర్భిణుల ఆశలపై నీళ్లు చల్లేందుకు ట్రంప్ ప్రభుత్వం సిద్ధమైంది. వారి కోసం ప్రత్యేకంగా కొత్త వీసా నిబంధనలు తీసుకురావాలని యోచిస్తోంది. దీనికి సంబంధించిన ముసాయిదాను నేడు వెల్లడించనున్నట్టు ప్రభుత్వం పేర్కొంది. ఈ నిబంధనలు కనుక అమల్లోకి వస్తే పర్యాటక వీసాపై గర్భిణులు అమెరికా వెళ్లడం మరింత కష్టమవుతుంది. ఫలితంగా అమెరికాలో ప్రసవిస్తే అక్కడి పౌరసత్వం లభిస్తుందని భావించే వారికి ఇది చేదు గుళికగా మారనుంది. అయితే, ఈ నిబంధనను అమలు చేయడం అంత సులభం కాదని నిపుణులు చెబుతున్నారు. ఇప్పటికే పలు ఆంక్షల పేరుతో అమెరికా వచ్చే వారికి ఝలక్ ఇస్తున్న ట్రంప్ ప్రభుత్వం.. ఇప్పుడు గర్భిణులపై దృష్టిసారించడం చర్చనీయాంశమైంది.