గతంలో ఎన్నడూ లేనంతగా దేశ రాజధాని ఢిల్లీని వాతావరణ కాలుష్యం పట్టి పీడిస్తోంది. దీని దెబ్బకు వందలాది విద్యాలయాలు మూతబడ్డాయి. క్రికెట్ మ్యాచ్ లు కూడా రద్దయ్యాయి. అంతేకాదు, జనాలు మాస్కులు వేసుకొని తిరుగుతున్నారు. ఈ నేపథ్యంలో రాజధాని నగరంలో వాతావరణ కాలుష్యాన్ని తగ్గించేందుకు తగిన సలహాలు ఇవ్వాలంటూ ఢిల్లీ టూరిజం మంత్రి కపిల్ మిశ్రా ప్రజలను కోరారు. ఈ పిలుపుకు ఊహించనంతగా స్పందన వచ్చింది. కేవలం గంటలోపే 5వేల మంది తమ సూచనలు ఇచ్చారు. ఈ నేపథ్యంలో మంత్రి మిశ్రా మాట్లాడుతూ, ఢిల్లీ ప్రజలు చేతులు కలుపుతున్నారని... అందరం కలసి ఢిల్లీని శుభ్రపరచుకుందామని, జీవించడానికి మెరుగైన ప్రదేశంగా మార్చుకుందామని చెప్పారు. ఛేంజ్.ఆర్గ్ ( change.org) వెబ్ సైట్ ద్వారా పరిస్థితిని మెరుగుపరిచేందుకు అనువైన సలహాలు ఇవ్వాల్సిందిగా మిశ్రా కోరారు. పరిస్థితిని మార్చేందుకు ఢిల్లీ ప్రభుత్వం ఎలాంటి చర్యలు చేపట్టాలో సూచించండని విన్నవించారు.