నవ్యాంధ్ర రాజధాని అమరావతిలో నిర్మితమవుతున్న తాత్కాలిక సచివాలయానికి మొట్టమొదటగా తరలే శాఖల వివరాలను ఏపీ ప్రభుత్వం వెల్లడించింది. వెలగపూడికి వెళ్లే శాఖలపై చీఫ్ సెక్రటరీ ఎస్పీ టక్కర్ కొద్దిసేపటి క్రితం అధికారులతో సమీక్షించారు. 29న మధ్యాహ్నం 2:59కి వివిధ శాఖలను ప్రారంభించాలని ముహూర్తం నిర్ణయించినట్టు తెలిపారు. తొలి దశలో పంచాయతీ రాజ్, గ్రామీణాభివృద్ధి, గృహ నిర్మాణం, రోడ్లు, భవనాలు, కార్మిక, ఉపాధి, వైద్య, ఆరోగ్య, కుటుంబ సంక్షేమ శాఖలు వెలగపూడికి వస్తాయని వివరించారు. ఐదో భవనం కింది అంతస్తులో ఈ శాఖలు ప్రారంభమవుతాయని వెల్లడించారు. తదుపరి భవనాలు అందుబాటులోకి వచ్చిన తరువాత మరిన్ని శాఖలు వస్తాయని తెలిపారు.
