గ్రేటర్ హైదరాబాదు మునిసిపల్ కార్పొరేషన్ (జీహెచ్ఎంసీ) ప్రధాన కార్యాలయం వద్ద ఉద్రిక్త పరిస్థితులు నెలకొన్నాయి. టీడీపీ గ్రేటర్ అధ్యక్షుడు, జూబ్లీహిల్స్ ఎమ్మెల్యే మాగంటి గోపీనాథ్ ఆధ్వర్యంలో టీడీపీ, బీజేపీలకు చెందిన ఎమ్మెల్యేలు, పెద్ద సంఖ్యలో కార్యకర్తలు జీహెచ్ఎంసీ వద్ద ధర్నాకు దిగారు. జీహెచ్ఎంసీ ఎన్నికల నేపథ్యంలో గ్రేటర్ పరిధిలో 25 లక్షల ఓట్లను తొలగించారని, డివిజన్ల పునర్విభజన ఇష్టారాజ్యంగా జరిగిందని ఆరోపించారు. అంతేకాక తొలగించిన ఓట్లన్నింటినీ తిరిగి జాబితాల్లో చేర్చాలని, ఆ తర్వాతే ఎన్నికలు జరపాలని నేతలు డిమాండ్ చేశారు. ఈ క్రమంలో కార్యాలయంలోకి చొచ్చుకెళ్లేందుకు యత్నించిన నేతలను అడ్డుకున్నారు. ఈ సందర్భంగా ఇరువర్గాల మధ్య తోపులాట చోటుచేసుకుంది. ఈ క్రమంలో ఆ రెండు పార్టీలకు చెందిన పలువురు కీలక నేతలు సహా ఒకరిద్దరు ఎమ్మెల్యేలు కూడా కిందపడిపోయారు. అయినా వెనక్కు తగ్గని పోలీసులు టీడీపీ, బీజేపీ నేతలను అరెస్ట్ చేసి అక్కడి నుంచి తరలించారు.