అత్యంత ధైర్య సాహసాలు ప్రదర్శిస్తూ, మయన్మార్ లోకి దూసుకెళ్లిన భారత సైన్యం 45 నిమిషాల పాటు తుపాకులతో విరుచుకుపడి 100 మంది మిలిటెంట్లను మట్టుబెట్టినట్టు హోం శాఖ వర్గాలు వెల్లడించాయి. భారత దళాలు పూర్తి ఆధిపత్యాన్ని ప్రదర్శిస్తూ, ఈ ఆపరేషన్ ను నిర్వహించాయని, మిలిటెంట్లకు ఒక్క రౌండ్ కాల్పులు జరిపే అవకాశం కూడా లభించలేదని తెలిపాయి. ఈ దాడిలో గాయపడి ప్రాణాలు దక్కించుకున్న మిలిటెంట్లను ఆసుపత్రుల్లో చేర్చినట్టు తెలుస్తోంది. ఈ ఉదయం భారత వాయుసేన ఇండియా- మయన్మార్ సరిహద్దుల్లో సోదాలు జరిపి, భారత సైన్యంపై తెగబడ్డ మిలిటెంట్లు మయన్మార్ పారిపోయి అడవుల్లో నక్కారని స్పష్టం చేసిన నేపథ్యంలో భద్రతాదళాలు ఈ ఆపరేషన్ చేపట్టాయి. భారత సైన్యం సరిహద్దులు దాటే ముందు మయన్మార్ ప్రభుత్వానికి సమాచారం ఇచ్చినట్టు హోం శాఖ వెల్లడించింది. భారత సైన్యానికి మయన్మార్ సహకరించిందని, భద్రతాదళాలు ప్రవేశించిన సమయంలో మయన్మార్ సైన్యం ఆ ప్రాంతాన్ని వీడి వెళ్లిందని తెలిసింది. మరోవైపు నాగాలాండ్ బార్డర్ వద్ద ఆర్మీ, మిలిటెంట్లకు జరిగిన పోరులో 15 మంది మరణించినట్టు సమాచారం. సరిహద్దులు దాటిన భద్రతాదళాలు క్షేమంగా వెనక్కు తిరిగి వచ్చాయని తెలుస్తోంది.