తెలుగు రాష్ట్రాల్లో ప్రమాదాల బారిన పడుతున్న ప్రైవేట్ ట్రావెల్స్ బస్సుల సంఖ్య నానాటికీ పెరిగిపోతోంది. హైదరాబాదు నుంచి మదనపల్లి బయలుదేరిన ఎస్ఎస్ ట్రావెల్స్ బస్సు గత రాత్రి బోల్తా పడింది. అనంతపురం జిల్లా గుత్తి వద్ద చోటుచేసుకున్న ఈ ప్రమాదంలో ఓ యువతి మృత్యువాతపడింది. బాధితురాలిని అనంతపురం జిల్లా కదిరి మండలం కాలసముద్రం వాసిగా గుర్తించారు. ఈ ప్రమాదంలో మరో 20 మంది ప్రయాణికులకు గాయాలయ్యాయి. క్షతగాత్రుల్లో ముగ్గురి పరిస్థితి విషమంగా ఉన్నట్లు తెలుస్తోంది. గాయపడ్డవారిని చికిత్స నిమిత్తం సమీపంలోని ఆస్పత్రికి తరలించారు. ప్రమాదం జరిగిన సమయంలో బస్సులో 51 మంది ప్రయాణికులున్నట్లు సమాచారం.