బెజవాడ పోలీసుల దాష్టీకాలు నానాటికీ మితిమీరిపోతున్నాయి. రాత్రి వేళ్లలో బయటకు రావాలంటే ఐడీ కార్డులుండాల్సిందేనంటూ ఇటీవల ఆదేశాలు జారీ చేసి సర్కారు ఆగ్రహానికి గురైన విజయవాడ పోలీసులు తాజాగా ఇద్దరు యువకులపై అకారణంగా లాఠీలు ఝుళిపించారు. నగరంలోని లబ్బీపేటలో రాత్రి చోటుచేసుకున్న ఈ ఘటనలో ఓ యువకుడు కోమాలోకి వెళ్లగా, మరో యువకుడికి తీవ్ర గాయాలయ్యాయి. రాత్రివేళ బయటకు వచ్చిన ఆ ఇద్దరు యువకులు తమను నిలువరించిన పోలీసులను ఎందుకు ఆపారంటూ ప్రశ్నించారు. ఇదే వారు చేసిన ఘోరమైన తప్పిదం. తమను ప్రశ్నించిన యువకులపై లబ్బీపేట పోలీసులు లాఠీలు ఝుళిపించారు. లాఠీచార్జీలో కల్యాణ్ రెడ్డి అనే యువకుడు కోమాలోకి వెళ్లాడు. ఈ ఘటనను చూసిన స్థానికులు అక్కడకు పరుగెత్తుకొచ్చారు. దీంతో తమ తప్పు తెలుసుకున్న పోలీసులు తమ బైక్ ను అక్కడే వదిలేసి పరారయ్యారు. గాయపడ్డ యువకులను స్థానికులు హుటాహుటీన ఆస్పత్రికి తరలించారు.