శ్రీలంకలో సమాంతర పాలన నడిపిన కాలంలో ఎల్టీటీఈ ప్రజల నుంచి పెద్ద ఎత్తున బంగారం, ఇతర ఆభరణాలను తీసుకుంది. ఎల్టీటీఈని లంక సైన్యం తుదముట్టించడంతో అవన్నీ ప్రభుత్వపరం అయ్యాయి. తాజాగా, శ్రీలంక అధ్యక్షుడు మహింద రాజపక్స ఆ నగలన్నింటినీ స్వయంగా ఉత్తర ప్రాంత ప్రజలకు ఇచ్చేశారు. జాఫ్నా ప్రాంతంలో ఓ దశలో ఎల్టీటీఈ ప్రభుత్వానికి సమాంతరంగా పాలన నిర్వహించింది. ఆ సమయంలో విలువైన ఆభరణాలను ప్రజల నుంచి బలవంతంగా లాగేసుకున్నారని, లేక, ప్రజలే ఎల్టీటీఈకి అప్పగించారని కొన్ని వాదనలు ఉన్నాయి. కీలకమైన అధ్యక్ష ఎన్నికలు సమీపిస్తుండడంతో రాజపక్స దృష్టి తమిళులపై పడింది. వారి ఓట్లను రాబట్టే క్రమంలోనే ఈ ఆభరణాలను తిరిగి ఇచ్చేసినట్టుగా కనిపిస్తోంది. ఉత్తరప్రాంత తమిళులను తన నివాసానికి ఆహ్వానించి మరీ, నగలను ఇచ్చారు. ఈ సందర్భంగా ఆయన మాట్లాడుతూ, బంగారం కంటే విలువైన 'స్వేచ్ఛ'ను ప్రసాదించానని పేర్కొన్నారు.