చరిత్ర సృష్టించిన ఏడేళ్ల బాలుడు.. పాక్ జలసంధిపై భారత పతాకం

ఝార్ఖండ్‌కు చెందిన ఏడేళ్ల బాలుడు ఇషాంక్ సింగ్ సముద్రంలో అద్భుతం చేసి చరిత్ర సృష్టించాడు. భారత్, శ్రీలంక మధ్యనున్న పాక్ జలసంధిని ఈది, ఈ ఘనత సాధించిన అత్యంత పిన్న వయస్కుడిగా ప్రపంచ రికార్డు నెలకొల్పాడు. శుక్రవారం జరిగిన ఈ సాహసయాత్రలో ఇషాంక్ 29 కిలోమీటర్ల దూరాన్ని కేవలం 9 గంటల 50 నిమిషాల్లో పూర్తి చేశాడు.

శ్రీలంకలోని తలైమన్నార్ వద్ద శుక్రవారం ఉదయం 4 గంటలకు తన ఈతను ప్రారంభించిన ఇషాంక్ బలమైన సముద్ర ప్రవాహాలు, అలలను అధిగమించి మధ్యాహ్నం 1:50 గంటలకు తమిళనాడులోని ధనుష్కోడి సమీపంలోని అరిచల్మునై తీరానికి చేరుకున్నాడు. తీరానికి చేరుకున్న ఇషాంక్‌కు అధికారులు, అభిమానులు ఘన స్వాగతం పలికారు.

    
ఈ విజయంతో 2019లో 10 ఏళ్ల వయసులో 10 గంటల 30 నిమిషాల్లో పాక్ జలసంధిని ఈదిన తమిళనాడుకు చెందిన జై జశ్వంత్ రికార్డును ఇషాంక్ బద్దలు కొట్టాడు. ఇషాంక్ విజయంపై ఝార్ఖండ్ ముఖ్యమంత్రి హేమంత్ సోరెన్ ఎక్స్ ద్వారా ప్రశంసలు కురిపించారు. "ఇషాంక్ అసాధారణ ప్రతిభావంతుడు. అతడి క్రమశిక్షణ, అంకితభావం ఝార్ఖండ్‌కే కాకుండా దేశం మొత్తానికే గర్వకారణం" అని ఆయన పేర్కొన్నారు.