విదేశీ గడ్డపై అపోలో సేవలు.. ఇరాక్‌తో భారీ డీల్

భారతదేశంలోని ప్రముఖ కార్పొరేట్ వైద్య సేవల సంస్థ అపోలో హాస్పిటల్స్ తన కార్యకలాపాలను అంతర్జాతీయ స్థాయికి విస్తరించింది. ఈ క్రమంలో మధ్యప్రాచ్య దేశమైన ఇరాక్‌లో వైద్య సేవలు అందించేందుకు ఆ దేశ అంతర్గత మంత్రిత్వ శాఖతో ఒక కీలక ఒప్పందం కుదుర్చుకుంది. ఈ ఒప్పందం ద్వారా భారత వైద్య రంగం మరో మైలురాయిని చేరుకున్నట్లయింది.

ఈ వ్యూహాత్మక ఒప్పందంలో భాగంగా, అపోలో హాస్పిటల్స్ బృందం ఇరాక్‌లోని అంతర్గత భద్రతా దళాల (ఇంటర్నల్ సెక్యూరిటీ ఫోర్సెస్) హాస్పిటల్ నిర్వహణ బాధ్యతలను స్వీకరించనుంది. దీంతోపాటు ఆ దేశ భద్రతా దళాలకు, వారి కుటుంబ సభ్యులకు అవసరమైన అత్యాధునిక వైద్య సేవలను అందిస్తుందని అపోలో హాస్పిటల్స్ జాయింట్ మేనేజింగ్ డైరెక్టర్ సంగీతా రెడ్డి ఒక ప్రకటనలో తెలిపారు.

ఈ అంతర్జాతీయ విస్తరణపై అపోలో హాస్పిటల్స్ వ్యవస్థాపక చైర్మన్ డాక్టర్ ప్రతాప్ సి. రెడ్డి స్పందించారు. ‘హీల్ ఇన్ ఇండియా, హీల్ బై ఇండియా, హీల్ ఫ్రమ్ ఇండియా’ అనే తమ ప్రధాన నినాదానికి అనుగుణంగానే ఈ నిర్ణయం తీసుకున్నట్లు ఆయన వివరించారు. ప్రపంచవ్యాప్తంగా నాణ్యమైన వైద్య సేవలను అందించాలన్న తమ లక్ష్యంలో ఇదొక ముఖ్యమైన ముందడుగు అని ఆయన పేర్కొన్నారు.