సూర్య 41వ సినిమాకి తెలుగు టైటిల్ ఖరారు!

'ఆకాశం నీ హద్దురా' .. 'జై భీమ్' వంటి హిట్స్ తరువాత సూర్య చేసిన 'ఈటి'తో హ్యాట్రిక్ హిట్ పడుతుందని అంతా భావించారు. కానీ అలా జరగలేదు. 'ఈటి'తో సూర్య చేసిన ప్రయోగం ఫలించలేదు. తమిళంలోనే ఈ సినిమా చెప్పుకోదగిన ఓపెనింగ్స్ తెచ్చుకోలేకపోయింది. అలా హ్యాట్రిక్ హిట్ మిస్సయిన సూర్య, ఆ తర్వాత మూడు ప్రాజెక్టులను లైన్లో పెట్టాడు.

బాలా .. వెట్రిమారన్ .. సుధ కొంగర సినిమాలు ఆ జాబితాలో ఉన్నాయి. ముందుగా బాలా సినిమాను పూర్తిచేసే పనిలో సూర్య ఉన్నాడు. ఈ సినిమాను కూడా తమిళంతో పాటు తెలుగులో విడుదల చేయనున్నారు. ఈ రోజున బాలా పుట్టినరోజు కావడంతో ఈ సినిమాకి టైటిల్ ను ఖరారు చేశారు.

తమిళంలో ఈ సినిమాకి 'వనంగాన్' అనే టైటిల్ ను నిర్ణయించగా.. తెలుగులో 'అచలుడు' అనే టైటిల్ ను సెట్ చేశారు. కొంతసేపటి క్రితమే టైటిల్ పోస్టర్స్ ను వదిలారు. జీవీ ప్రకాశ్ కుమార్ సంగీతాన్ని సమకూర్చిన ఈ సినిమాలో, సూర్య జోడీగా కృతి శెట్టి కనిపించనుంది. 'దీపావళి'కి ఈ సినిమాను రిలీజ్ చేసే అవకాశం ఉంది.