కేంద్ర బడ్జెట్ మొబైల్ యాప్ ను ఆవిష్కరించిన నిర్మలా సీతారామన్

23-01-2021 Sat 21:22
  • త్వరలో బడ్జెట్ సమావేశాలు
  • ఫిబ్రవరి 1న కేంద్ర బడ్జెట్ ప్రకటన
  • పార్లమెంటులో హల్వా తయారీ కార్యక్రమం
  • సాధారణ ప్రజానీకానికి కూడా అందుబాటులోకి బడ్జెట్ ప్రతులు
Nirmala Sitharaman launched union budget mobile app

మునుపెన్నడూ లేని విధంగా కేంద్రం వార్షిక బడ్జెట్ కోసం మొబైల్ యాప్ తీసుకువస్తోంది. ఈ కేంద్ర బడ్జెట్ యాప్ ను కేంద్ర ఆర్థికశాఖ మంత్రి నిర్మలా సీతారామన్ ఇవాళ ఢిల్లీలో ఆవిష్కరించారు. బడ్జెట్ పత్రాలను పార్లమెంటు సభ్యులతో పాటు సాధారణ ప్రజానీకానికి కూడా ఈ యాప్ ద్వారా అందుబాటులోకి తెస్తున్నారు. బడ్జెట్ ప్రవేశపెట్టే ముందు పార్లమెంటులో సంప్రదాయంగా వస్తున్న హల్వా తయారీ కార్యక్రమంలో పాల్గొన్న నిర్మలా సీతారామన్ ఈ సందర్భంగా యాప్ ను విడుదల చేశారు.

వార్షిక ఆర్థిక ప్రకటన, డిమాండ్ ఫర్ గ్రాంట్స్, ఫైనాన్స్ బిల్లు సహా 14 బడ్జెట్ పత్రాలను ఈ యాప్ లో చూడొచ్చు. ఈ యాప్ వినియోగం ఎంతో సులువని, ఇందులో యూజర్లకు ఉపకరించేలా డౌన్ లోడ్, ప్రింట్, సెర్చ్, జూమ్ ఇన్, జూమ్ అవుట్, బైడెరెక్షనల్ స్క్రోలింగ్, టేబుల్ ఆఫ్ కంటెంట్స్, ఎక్స్ టర్నల్ లింక్స్ ఫీచర్లున్నాయి. ఈ యాప్ ఇంగ్లీషు, హిందీ భాషల్లో ఆండ్రాయిడ్ మరియు ఐఓఎస్ ప్లాట్ ఫాంలపై అందుబాటులో ఉంటుంది. ఫిబ్రవరి 1న కేంద్ర ఆర్థికమంత్రి పార్లమెంటులో బడ్జెట్ ప్రసంగం పూర్తి చేసిన వెంటనే బడ్జెట్ ప్రతులు ఈ యాప్ లో అందుబాటులోకి వస్తాయి.

ఈ యాప్ ను నేషనల్ ఇన్ఫర్మాటిక్స్ సెంటర్ (ఎన్ఐసీ) అభివృద్ధి చేసింది. ఈ యాప్ ను కేంద్ర బడ్జెట్ వెబ్ పోర్టల్ నుంచి కూడా డౌన్ లోడ్ చేసుకోవచ్చు. కాగా, ఈసారి బడ్జెట్ పూర్తిగా డిజిటల్ మయం కానుంది. కరోనా నేపథ్యంలో బడ్జెట్ ప్రతులను కాగితంపై ముద్రించడంలేదు.