యాపిల్ నుంచి వస్తున్న చిన్న ఫోన్.. ఐ ఫోన్ 12 మినీ!

ఐఫోన్ కొత్త మోడల్ వచ్చేస్తోంది. సంస్థ నుంచి 12వ తరం ఫోన్ గా, అక్టోబర్ లో దీన్ని విడుదల చేసేందుకు సంస్థ సన్నాహాలు చేస్తుండగా, ఈ ఫోన్ గురించి మరో లీక్ బయటకు వచ్చింది. ఈ ఫోన్ చిన్నగా ఉంటుందని, కేవలం 5.4 అంగుళాల సైజ్ లో ఉండే దీని పేరు 'ఐఫోన్ 12 మినీ' అని తెలుస్తోంది. కాగా, తొలుత ఈ ఫోన్ ను 'ఐఫోన్ 12' అని పిలుస్తారని, 'ఐఫోన్ 12 మ్యాక్స్' అంటారని వార్తలు వచ్చిన సంగతి తెలిసిందే.

తాజాగా అందుతున్న సమాచారాన్ని బట్టి, అక్టోబర్ లో ఈ ఫోన్ విడుదల కానుంది. కాగా, ఇప్పటికే ఐపాడ్, మాక్ కంప్యూటర్లలో యాపిల్ మినీ వర్షన్లను తీసుకుని వచ్చిన సంగతి తెలిసిందే. ఇదే సమయంలో 4, 5వ తరం ఫోన్లు చిన్నవే. ఇక, ఈ కొత్త ఫోన్లు 5జీ రేడియో తరంగాలకు మద్దతిస్తాయని, ఓఎల్ఈడీ స్క్రీన్లు, 60 హెర్జ్ రిఫ్రష్ రేటు, అద్భుతమైన పనితీరును ప్రదర్శిస్తాయని సంస్థ ప్రతినిధులు అంటున్నారు.