లాస్ ఏంజెల్స్ ఒలింపిక్స్ 2028: అమెరికా, బంగ్లాదేశ్‌లో క్రికెట్ క్వాలిఫైయింగ్ టోర్నీలు

లాస్ ఏంజెల్స్ 2028 ఒలింపిక్స్‌లో క్రికెట్ పునరాగమనానికి సంబంధించి అంతర్జాతీయ క్రికెట్ మండలి (ఐసీసీ) కీలక నిర్ణయాలు తీసుకుంది. ఒలింపిక్స్‌లో చోటు దక్కించుకునే జట్లను నిర్ణయించే ఆఖరి క్వాలిఫైయింగ్ టోర్నమెంట్ల వేదికలు, తేదీలను ఐసీసీ ఖరారు చేసింది. ఇండోనేషియాలోని బాలిలో జరిగిన ఐసీసీ బోర్డు సమావేశంలో ఈ మేరకు ఆమోదం తెలిపారు.

పురుషుల విభాగం ఒలింపిక్ క్వాలిఫైయర్ టోర్నమెంట్‌ను 2028 ఫిబ్రవరి 5 నుంచి 13 వరకు అమెరికాలో నిర్వహించనున్నారు. మహిళల క్వాలిఫైయర్ పోటీలు బంగ్లాదేశ్ వేదికగా 2028 ఫిబ్రవరి 26 నుంచి మార్చి 5 వరకు జరుగుతాయి. ఈ రెండు టోర్నమెంట్లలోనూ ఎనిమిదేసి జట్లు తలపడతాయి. ఒక్కో టోర్నీలో జట్లను నాలుగు చొప్పున రెండు గ్రూపులుగా విభజించి, మొత్తం 13 మ్యాచ్‌లు నిర్వహిస్తారు. గ్రూప్ విజేతలుగా నిలిచిన జట్లు ఫైనల్లో తలపడతాయి. ఫైనల్ విజేత లాస్ ఏంజెల్స్ 2028 ఒలింపిక్స్‌కు నేరుగా అర్హత సాధిస్తుంది.

ఈ సందర్భంగా ఐసీసీ చీఫ్ ఎగ్జిక్యూటివ్ ఆఫీసర్ (సీఈవో) సంజోగ్ గుప్తా మాట్లాడుతూ.. అంతర్జాతీయంగా క్రికెట్ విస్తరణకు, క్రీడాకారులకు అవకాశాలు కల్పించేందుకు ఈ ఈవెంట్స్ క్యాలెండర్, క్వాలిఫికేషన్ ప్రక్రియ ఎంతో దోహదపడతాయని పేర్కొన్నారు. అంతర్జాతీయ క్రికెట్ సమగ్ర వికాసానికి ఐసీసీ షెడ్యూల్ ఒక పటిష్ఠమైన పునాదిగా నిలుస్తుందని, ఆటగాళ్లు ముందస్తు ప్రణాళికలతో సిద్ధం కావడానికి ఇది ఉపయోగపడుతుందని ఆయన తెలిపారు.

టీ20 ప్రపంచకప్ క్వాలిఫైయర్ల విధానం
2028లో ఆస్ట్రేలియా, న్యూజిలాండ్ సంయుక్తంగా ఆతిథ్యం ఇవ్వనున్న పురుషుల టీ20 ప్రపంచకప్‌నకు సంబంధించిన గ్లోబల్ క్వాలిఫైయర్ ఫ్రేమ్‌వర్క్‌ను కూడా బోర్డు ఆమోదించింది. 2028 తొలి త్రైమాసికంలో 16 జట్లతో మొత్తం 31 మ్యాచ్‌ల పాటు ఈ టోర్నీ జరగనుంది. నాలుగు గ్రూపులుగా పోటీలు నిర్వహించి క్వార్టర్ ఫైనల్స్, సెమీస్, ఫైనల్ ద్వారా 8 జట్లను ప్రధాన టోర్నీకి ఎంపిక చేస్తారు.

అలాగే, 2028 మహిళల టీ20 ప్రపంచకప్ గ్లోబల్ క్వాలిఫైయర్‌లో నెదర్లాండ్స్, స్కాట్లాండ్‌లతో పాటు ప్రాంతీయ అర్హత టోర్నీల నుంచి వచ్చే మరో 8 జట్లు తలపడతాయి. ఆఫ్రికా, ఆసియా, ఈస్ట్ ఆసియా-పసిఫిక్ ప్రాంతాల నుంచి రెండేసి, అమెరికాస్, యూరప్ నుంచి ఒక్కో జట్టు ఇందులో పాల్గొంటాయి. ఈ గ్లోబల్ క్వాలిఫైయర్‌లో టాప్ 2 స్థానాల్లో నిలిచిన జట్లు మహిళల టీ20 ప్రపంచకప్‌నకు అర్హత సాధిస్తాయి.

2035 వరకు ఐసీసీ ఈవెంట్ల షెడ్యూల్
భవిష్యత్ ప్రణాళికల్లో భాగంగా 2035 వరకు జరగనున్న పలు ప్రధాన టోర్నమెంట్ల తేదీలు, వేదికలను ఐసీసీ వెల్లడించింది:

2028 పురుషుల టీ20 ప్రపంచకప్: ఆస్ట్రేలియా, న్యూజిలాండ్ (అక్టోబర్ 12 - నవంబర్ 12)

2029 వరల్డ్ టెస్ట్ ఛాంపియన్‌షిప్ (డబ్ల్యూటీసీ) ఫైనల్: ఇంగ్లండ్ (జూన్ 8 - 12)

2029 పురుషుల ఛాంపియన్స్ ట్రోఫీ: భారత్ (అక్టోబర్ 9 - 28)

2030 పురుషుల టీ20 ప్రపంచకప్: ఇంగ్లండ్, ఐర్లాండ్, స్కాట్లాండ్ (జులై 4 - ఆగస్టు 4)

2031 పురుషుల వన్డే ప్రపంచకప్: భారత్, బంగ్లాదేశ్ (అక్టోబర్ 9 - నవంబర్ 23)

వీటితో పాటు 2032 పురుషుల టీ20 ప్రపంచకప్, 2033 డబ్ల్యూటీసీ ఫైనల్, ఛాంపియన్స్ ట్రోఫీ, 2034 టీ20 ప్రపంచకప్, 2035 డబ్ల్యూటీసీ ఫైనల్, వన్డే ప్రపంచకప్‌లను నిర్వహించనున్నట్లు ఐసీసీ తెలిపింది. వీటి ఆతిథ్య దేశాల వివరాలను రానున్న రోజుల్లో వెల్లడించనున్నారు. 

అలాగే 2027 పురుషుల వన్డే వరల్డ్ కప్ క్వాలిఫైయర్ టోర్నమెంట్‌ను 2027 ఫిబ్రవరి-మార్చి నెలల్లో 10 జట్లతో, 23 మ్యాచ్‌ల ఫార్మాట్‌లో నిర్వహించనున్నట్లు బోర్డు స్పష్టం చేసింది.