మహిళలకు ఆర్టీసీ మరో వరం.. నెలవారీ పాస్‌పై 50 శాతం డిస్కౌంట్!

టీజీఎస్ ఆర్టీసీ ప్రయాణికులకు శుభవార్త చెప్పింది. బస్సు ప్రయాణాన్ని మరింత ఆదాగా, సౌకర్యంగా మార్చే లక్ష్యంతో నెలవారీ సీజన్ టికెట్ల (ఎంఎస్‌టీ)పై పలు కొత్త రాయితీలు, సదుపాయాలను ప్రకటించింది. సవరించిన ఈ నిబంధనలు శనివారం నుంచే రాష్ట్రవ్యాప్తంగా అమల్లోకి రానున్నట్లు స్పష్టం చేసింది.

మహిళా ప్రయాణికులను దృష్టిలో ఉంచుకుని ఆర్టీసీ కీలక నిర్ణయం తీసుకుంది. ప్రస్తుతం ఆర్డినరీ, ఎక్స్‌ప్రెస్ బస్సుల్లో మహిళలు ఉచితంగా ప్రయాణిస్తున్నప్పటికీ.. మెట్రో, రాజధాని, డీలక్స్ వంటి సర్వీసుల్లో పాస్‌లు కొనుగోలు చేయాల్సి వస్తోంది. అలాంటి వారి కోసం ఇకపై నెలవారీ రూట్ పాస్‌పై 50 శాతం రాయితీ కల్పించారు. అంటే, కేవలం 15 రోజుల రుసుము చెల్లిస్తే చాలు, నెల మొత్తం ప్రయాణించవచ్చు. ఉదాహరణకు, హైదరాబాద్-వరంగల్ రూట్ పాస్‌ను సగం ధరకే పొందవచ్చు.

అంతేకాకుండా, పాస్‌ల ధరలను మరింత తగ్గించేందుకు టోల్ ప్లాజా చార్జీల లెక్కింపు విధానంలో మార్పులు చేసింది. ఇప్పటివరకు 25 రోజులకు లెక్కిస్తున్న టోల్ చార్జీలను ఇకపై 20 రోజులకు మాత్రమే పరిగణనలోకి తీసుకుంటారు. దీనివల్ల అన్ని రకాల పాస్‌ల ధరలు స్వల్పంగా తగ్గనున్నాయి. కొత్తగా 'డీలక్స్ నెలవారీ సీజన్ టికెట్'ను కూడా ప్రవేశపెడుతున్నారు. ఈ పాస్‌తో 'ఇ-డీలక్స్' సర్వీసుల్లోనూ ప్రయాణించే వీలుంటుంది.

ఇక హైదరాబాద్, వరంగల్, కరీంనగర్, నల్గొండ, నిజామాబాద్ నగరాల్లో నెలవారీ సిటీ పాస్ ఉన్నవారికి మరో అదనపు ప్రయోజనం కల్పించారు. పాస్ ఉన్నవారు ఆదివారాల్లో అన్ని కేటగిరీల సిటీ బస్సుల్లో ఉచితంగా ప్రయాణించవచ్చని టీజీఎస్ ఆర్టీసీ ప్రకటించింది.