అమరావతిలో స్పోర్ట్స్ అకాడమీ ఏర్పాటు చేయండి.. ఆర్పీఎస్జీ గ్రూప్ ను కోరిన మంత్రి లోకేశ్

ప్రముఖ పారిశ్రామిక సంస్థ ఆర్పీఎస్జీ (RPSG) గ్రూప్ మేనేజింగ్ డైరెక్టర్ శాశ్వత్ గోయెంకాతో రాష్ట్ర విద్య, ఐటీ, ఎలక్ట్రానిక్స్ శాఖల మంత్రి నారా లోకేశ్ విశాఖపట్నంలో సమావేశమయ్యారు. ఈ భేటీలో రాష్ట్రంలో పెట్టుబడుల విస్తరణ, కొత్త ప్రాజెక్టుల ఏర్పాటుపై వారు విస్తృతంగా చర్చించారు. వివిధ రంగాల్లో ఆంధ్రప్రదేశ్ కల్పిస్తున్న అనుకూలతలను వివరిస్తూ, రాష్ట్రంలో మరిన్ని యూనిట్లు నెలకొల్పాల్సిందిగా ఆర్పీఎస్జీ గ్రూప్‌ను మంత్రి ఆహ్వానించారు.

ఆర్పీఎస్జీ గ్రూప్‌నకు చెందిన లగ్జరీ లైఫ్ స్టైల్ బ్రాండ్ 'ఎఫ్ఎస్పీ (FSP) డిజైన్ ప్రైవేట్ లిమిటెడ్' ద్వారా లగ్జరీ అపెరల్, బ్రైడల్ కౌచర్, ప్రీమియం రెడీ-టు-వేర్ గార్మెంట్స్ రంగానికి సంబంధించి సోర్సింగ్, తయారీ, డిజైన్ కేంద్రాన్ని మంగళగిరిలో ఏర్పాటు చేయాలని మంత్రి లోకేశ్ కోరారు. సోలార్, బ్యాటరీ ఎనర్జీ స్టోరేజ్ సిస్టమ్స్ (BESS), గ్రీన్ హైడ్రోజన్ ఆధారిత రౌండ్-ది-క్లాక్ (RTC) గ్రీన్ ఎనర్జీ ప్రాజెక్టులను ఏర్పాటు చేయడంతో పాటు విశాఖపట్నం, తిరుపతి నగరాల్లో కార్యకలాపాలు ముమ్మరం చేయాలని స్పష్టం చేశారు.

ఐటీ రంగంపై చర్చిస్తూ, ఆర్పీఎస్జీ అనుబంధ సంస్థ 'ఫస్ట్ సోర్స్ సొల్యూషన్స్' కార్యకలాపాలను విజయవాడలో మరింత విస్తరించాలని మంత్రి లోకేశ్ సూచించారు. దీంతో పాటు విశాఖపట్నం లేదా తిరుపతి నగరాల్లో కొత్త ఐటీ కార్యాలయాలు ఏర్పాటు చేసే అంశాన్ని పరిశీలించాలని కోరారు.

క్రీడారంగం అభివృద్ధికి సంబంధించి కూడా కీలక అంశాలు చర్చకు వచ్చాయి. ఆర్పీఎస్జీ ఆధ్వర్యంలో అమరావతిలో ప్రత్యేక సౌకర్యాలతో కూడిన 'స్పోర్ట్స్ ట్రైనింగ్ అకాడమీ'ని ఏర్పాటు చేయాలని మంత్రి సూచించారు. సంస్థకు చెందిన ఫ్రాంచైజీ వ్యవస్థలైన లక్నో సూపర్ జెయింట్స్, డర్బన్ సూపర్ జెయింట్స్ ఎకోసిస్టమ్‌కు క్షేత్రస్థాయి నుంచి ప్రతిభను ఎంపిక చేయడానికి ఆంధ్ర ప్రీమియర్ లీగ్ (APL)లో స్థానిక జట్టును బరిలోకి దింపే అవకాశాలను పరిశీలించాలని కోరారు. రాష్ట్రంలోని ప్రతిభావంతులైన గ్రామీణ యువతను గుర్తించి ప్రోత్సహించడానికి, గ్రామ స్థాయి నుంచి ప్రొఫెషనల్ స్థాయి వరకు తీర్చిదిద్దేందుకు పబ్లిక్-ప్రైవేట్-పీపుల్ భాగస్వామ్య (PPPP) నమూనాను రూపొందించాల్సిందిగా మంత్రి లోకేశ్ ప్రతిపాదించారు.

ఈ సందర్భంగా ఆర్పీఎస్జీ ఎండీ శాశ్వత్ గోయెంకా మాట్లాడుతూ... తమ సంస్థ ఇప్పటికే ఏపీలో పలు వ్యాపార కార్యకలాపాలు సాగిస్తోందని వివరించారు. ఫస్ట్ సోర్స్ సొల్యూషన్స్ లిమిటెడ్ కార్యాలయం విజయవాడలోని మేధా ఐటీ టవర్‌లో సమర్థవంతంగా పనిచేస్తోందని తెలిపారు. అలాగే స్పెన్సర్స్ రిటైల్ ద్వారా విజయవాడ, విశాఖపట్నం వంటి కీలక నగరాల్లో హైపర్‌మార్కెట్లు, సూపర్‌మార్కెట్లను నిర్వహిస్తున్నట్లు చెప్పారు. గత సీఐఐ భాగస్వామ్య సదస్సులో కుదుర్చుకున్న ఒప్పందం ప్రకారం, రాష్ట్రంలో రూ.3,286 కోట్ల భారీ పెట్టుబడితో 349.8 మెగావాట్ల విండ్ ఎనర్జీ ప్రాజెక్టును వేగంగా అభివృద్ధి చేస్తున్నామని ఆయన స్పష్టం చేశారు. రాష్ట్ర ప్రభుత్వం నుంచి వచ్చిన తాజా ప్రతిపాదనలను నిశితంగా పరిశీలించి నిర్ణయం తీసుకుంటామని శాశ్వత్ గోయెంకా వెల్లడించారు.

డిక్సన్ టెక్నాలజీస్ విస్తరణ: తిరుపతిలో మరో రూ.700 కోట్లు
ఈ సదస్సులో డిక్సన్ టెక్నాలజీస్ ప్రెసిడెంట్, చీఫ్ ఆపరేటింగ్ ఆఫీసర్ పంకజ్ శర్మతో మంత్రి లోకేశ్ ప్రత్యేకంగా సమావేశమయ్యారు. ఈ భేటీ అనంతరం తిరుపతి ఈఎంసీ-2 (EMC-II)లో కొత్తగా రూ.700 కోట్లు పెట్టుబడి పెట్టేందుకు పంకజ్ శర్మ సుముఖత వ్యక్తం చేశారు. దీని ద్వారా 2,300 మందికి ఉపాధి లభించనుంది. భారతదేశంలోనే అతిపెద్ద ఎల్ఈడీ టీవీ ప్లాంట్ కలిగిన డిక్సన్ సంస్థ.. తిరుపతి, కొప్పర్తిలలో కార్యకలాపాలు విస్తరిస్తుండటంపై మంత్రి హర్షం వ్యక్తం చేశారు. డిక్సన్-ఇన్వెంటెక్ జేవీ కింద ల్యాప్‌టాప్‌లు, డెస్క్‌టాప్‌లు, సర్వర్ల తయారీ యూనిట్లను ఏపీలో ఏర్పాటు చేయాలని ఆయన కోరారు. అలాగే కడప జిల్లా కొప్పర్తిలో సీపీ ప్లస్ యూనిట్‌ను రూ.450 కోట్లతో విస్తరిస్తున్నామని, దీనికి ఇప్పటికే ఎస్‌ఐపీబీ ఆమోదం లభించిందని పంకజ్ శర్మ తెలిపారు.

సాగర్ డిఫెన్స్‌తో భేటీ: జువ్వలదిన్నెలో రక్షణ, రోబోటిక్స్ హబ్
సాగర్ డిఫెన్స్ వ్యవస్థాపకుడు కెప్టెన్ నికుంజ్ పరాశర్‌తోనూ మంత్రి లోకేశ్ చర్చలు జరిపారు. పూణే లిక్విడ్ రోబోటిక్స్ మోడల్‌ను అనుసరించి నెల్లూరు జిల్లా జువ్వలదిన్నెను ఇండో-పసిఫిక్ ప్రాంతానికి ఎక్స్‌పోర్ట్ హబ్‌గా అభివృద్ధి చేయాలని మంత్రి ప్రతిపాదించారు. ఐఐటీ తిరుపతి, ఆంధ్రా యూనివర్సిటీలతో కలిసి మారిటైమ్ అటానమీ, రోబోటిక్స్ స్కిల్లింగ్ సెంటర్ ఏర్పాటు చేయాలని కోరారు. ఈస్టర్న్ నేవల్ కమాండ్, కోస్ట్ గార్డ్ కోసం మానవరహిత నౌకల (USV) ట్రయల్స్, మెయింటెనెన్స్ కోసం జువ్వలదిన్నెను కేంద్రంగా తీర్చిదిద్దేందుకు ఏపీ ప్రభుత్వం సంపూర్ణ మద్దతు ఇస్తుందని స్పష్టం చేశారు. నెల్లూరు ప్రాంతానికి టైర్-2 సప్లయర్లను తీసుకురావాలని, స్థానిక మత్స్యకార యువతకు ఉపాధి కల్పించాలని మంత్రి పిలుపునిచ్చారు. ప్రభుత్వ ప్రతిపాదనలను పరిశీలించి తగిన నిర్ణయం తీసుకుంటామని నికుంజ్ పరాశర్ తెలిపారు.