గూఢచర్యం నెపంతో టెక్నాలజీ దిగ్బంధం.. అమెరికాపై నిప్పులు చెరిగిన చైనా

ప్రముఖ చిప్ తయారీ దిగ్గజం ఎన్విడియా (Nvidia) సీఈవో జెన్సన్ హువాంగ్‌ను కేంద్రంగా చేసుకుని అమెరికా ఒక కల్పిత ‘గూఢచర్యం’ కథను తెరపైకి తెచ్చిందని చైనా తీవ్రస్థాయిలో ధ్వజమెత్తింది. తమ దేశంపై సాంకేతిక ఆంక్షలను సమర్థించుకునేందుకే వాషింగ్టన్ ఇలాంటి నాటకాలకు తెరలేపిందని బీజింగ్ ఆరోపించింది.

చైనా సాధిస్తున్న సాంకేతిక ప్రగతి కేవలం స్వతంత్ర ఆవిష్కరణలు, అంతర్జాతీయ సహకారం ద్వారానే సాధ్యమైందని చైనా విదేశాంగ శాఖ అధికార ప్రతినిధి మావో నింగ్ స్పష్టం చేశారు. తమ దేశంపై సాంకేతిక ఆంక్షలు విధించేందుకు అమెరికా ఇలాంటి గూఢచర్య కథలను అల్లడం తక్షణమే ఆపాలని ఆమె హితవు పలికారు. చైనా ప్రతిష్టను దిగజార్చేందుకు అమెరికా చేస్తున్న నిరాధారమైన ఆరోపణలుగా వీటిని ఆమె కొట్టిపారేశారు.

న్యూయార్క్ టైమ్స్ కథనం ప్రకారం.. జెన్సన్ హువాంగ్ వివాహేతర సంబంధాన్ని అడ్డం పెట్టుకుని చైనా నిఘా వర్గాలు సమాచారం రాబట్టేందుకు ప్రయత్నించాయని అమెరికా అధికారులు భావిస్తున్నారు. సింగపూర్‌కు చెందిన డేటా సెంటర్ సంస్థ ‘మెగాస్పీడ్’ మాజీ ఎగ్జిక్యూటివ్ ఆలిస్ హువాంగ్ (హువాంగ్ లే)తో జెన్సన్ హువాంగ్‌కు సంబంధం ఉన్నట్లు ఆరోపణలు వచ్చాయి. ఆమె చైనా ఇంటెలిజెన్స్ కోసం పనిచేశారని, ఎన్విడియా అత్యాధునిక చిప్‌లను చైనాకు చేరవేయడంలో మెగాస్పీడ్ సహకరించిందని అమెరికా అధికారులు అనుమానించారు. అయితే, చిప్‌ల మళ్లింపునకు సంబంధించి వచ్చిన ఆరోపణలపై ఇప్పటికే అంతర్గతంగా దర్యాప్తు జరిపామని, అందులో ఎలాంటి నిజం లేదని తేలిందని ఎన్విడియా స్పష్టం చేసింది.

మరోవైపు, వివాహేతర సంబంధం వ్యవహారంలో తాను తప్పు చేశానని జెన్సన్ హువాంగ్ అంగీకరిస్తూ తన భార్యకు, కుటుంబ సభ్యులకు బహిరంగంగా క్షమాపణలు చెప్పారు. ఈ వ్యవహారంపై ఎన్విడియా డైరెక్టర్ల బోర్డు స్వతంత్ర విచారణ చేపట్టింది. ఈ వ్యవహారం వల్ల అమెరికా జాతీయ భద్రతకు ఎలాంటి ముప్పు వాటిల్లలేదని బోర్డు నిర్ధారించింది. జెన్సన్ హువాంగ్ కంపెనీ సీఈవోగా కొనసాగుతారని అధికారికంగా ప్రకటించింది. అయితే, ఈ మొత్తం వ్యవహారంపై ఎఫ్‌బీఐ దర్యాప్తు చేస్తోందని అధ్యక్షుడు డొనాల్డ్ ట్రంప్ వెల్లడించారు. ఆమె గూఢచారి అన్న విషయం తనకు ఎంతమాత్రం తెలియదని హువాంగ్ తనతో చెప్పినట్లు ట్రంప్ పేర్కొన్నారు.

చైనాకు అధునాతన ఏఐ చిప్‌ల విక్రయాలపై అమెరికా విధిస్తున్న కఠిన ఆంక్షలను సడలించాలని జెన్సన్ హువాంగ్ ఎప్పటినుంచో గట్టిగా వాదిస్తున్నారు. రెండు ప్రధాన పార్టీల నుంచి తీవ్ర వ్యతిరేకత వ్యక్తమైనప్పటికీ, గత ఏడాది ఎన్విడియాకు చెందిన ‘H200’ చిప్‌లను చైనాకు ఎగుమతి చేసేందుకు ట్రంప్ అనుమతి ఇచ్చారు. సుమారు ఏడాది క్రితమే ఈ నిఘా వ్యవహారంపై ఇంటెలిజెన్స్ వర్గాలు ట్రంప్‌కు సమాచారం అందించినప్పటికీ, ఎన్విడియా ప్రయోజనాలు దెబ్బతినకుండా ఉండేందుకు, చైనాతో నెలకొన్న సున్నితమైన వాణిజ్య ఒప్పందానికి విఘాతం కలగకుండా ఉండేందుకు ఆయన ఎలాంటి చర్యలు తీసుకోలేదని తెలుస్తోంది.

షెన్‌జెన్‌లో వచ్చే వారం జరగనున్న ఏపెక్ (APEC) సదస్సు సందర్భంగా అమెరికా అధ్యక్షుడు డొనాల్డ్ ట్రంప్, చైనా అధ్యక్షుడు షీ జిన్‌పింగ్ మధ్య అత్యంత కీలకమైన ద్వైపాక్షిక భేటీ జరగనుంది. ఈ సమావేశానికి కొద్దిరోజుల ముందే ఇరుదేశాల మధ్య చిప్ వివాదం, గూఢచర్యం ఆరోపణలు తెరపైకి రావడం ప్రపంచవ్యాప్తంగా తీవ్ర చర్చనీయాంశంగా మారింది.