సొంత వ్యాపారం మొదలుపెట్టే ఉద్యోగులకు జీతంతో కూడిన సెలవులు.. 'ఐడీ ఫ్రెష్' సీఈవో బంపరాఫర్!

సాధారణంగా ఉద్యోగులు కంపెనీని విడిచి వెళుతుంటే యాజమాన్యాలు ఆందోళన చెందుతాయి. కానీ, కర్ణాటకకు చెందిన ఓ భారతీయ పారిశ్రామికవేత్త మాత్రం ఇందుకు పూర్తి భిన్నంగా ఆలోచిస్తున్నారు. తన ఉద్యోగులు సొంతంగా వ్యాపారాలు ప్రారంభించేందుకు ఏకంగా డబ్బులిచ్చి మరీ ప్రోత్సహిస్తున్నారు. విఫలమైతే తిరిగి ఉద్యోగంలోకి తీసుకుంటామంటూ భరోసా కల్పిస్తున్నారు. ఆయనే బెంగళూరు కేంద్రంగా పనిచేస్తున్న ఐడీ ఫ్రెష్ ఫుడ్ ఇండియా గ్లోబల్ సీఈవో ముస్తఫా పీసీ.

ఉద్యోగుల కోసం ఆయన ప్రకటించిన 'ఎంటర్‌ప్రెన్యూర్‌షిప్ పాలసీ' ఇప్పుడు సోషల్ మీడియాలో అందరి దృష్టిని ఆకర్షిస్తోంది. ఈ పాలసీ కింద, సొంతంగా వ్యాపారం ప్రారంభించాలనుకునే ఉద్యోగులకు కంపెనీ అండగా నిలుస్తుంది. వారికి జీతంతో కూడిన పాక్షిక సెలవు (partially paid sabbatical), ఐడీ కంపెనీ నాయకత్వ బృందంతో మెంటార్‌షిప్, అలాగే కంపెనీ భాగస్వామ్య నెట్‌వర్క్‌ను ఉపయోగించుకునే అవకాశం కల్పిస్తారు. ఒకవేళ వారి వ్యాపార ప్రయత్నాలు ఫలించకపోతే, ఎలాంటి సంకోచం లేకుండా తిరిగి ఐడీ కంపెనీలో చేరవచ్చని ముస్తఫా భరోసా ఇచ్చారు.

ఈ వినూత్న విధానం వెనుక తన గతానుభవమే ప్రేరణ అని ముస్తఫా 'లింక్డ్‌ఇన్‌'లో తెలిపారు. "కేవలం రూ. 50,000 పెట్టుబడితో బెంగళూరులోని ఓ చిన్న వంటగదిలో ఐడీని ప్రారంభించాం. ఎన్నో తప్పులు చేశాం, నిద్రలేని రాత్రులు గడిపాం. మాపై మాకే నమ్మకం లేనప్పుడు, కొద్దిమంది మాపై నమ్మకం ఉంచారు. అందుకే మేం ముందుకు సాగగలిగాం. ఆ నమ్మకం విలువ నాకు తెలుసు. ఇప్పుడు అదే నమ్మకాన్ని నా ఉద్యోగులకు అందించాలనుకుంటున్నాను" అని ఆయన పేర్కొన్నారు.

"మా ఉత్తమ ఉద్యోగులు కొందరు వీడ్కోలు చెప్పడం బాధ కలిగించవచ్చు. కానీ, ఏదో ఒకరోజు వారు సొంతంగా ఏదైనా నిర్మించి, సమాజంపై మా కంటే గొప్ప ప్రభావాన్ని చూపడం చూస్తే నా హృదయం గర్వంతో నిండిపోతుంది. వారు తమ కలలను సాకారం చేసుకోవాలని కోరుకుంటున్నాను" అని ముస్తఫా అన్నారు.

ఇలాంటి విధానాన్ని ప్రకటించిన ఏకైక వ్యవస్థాపకుడు ముస్తఫా మాత్రమే కాదు. 2021లో టెక్ కంపెనీ లాటిస్ సహ-వ్యవస్థాపకుడు జాక్ ఆల్ట్‌మన్ కూడా తమ సంస్థను విడిచిపెట్టి సొంత వ్యాపారం ప్రారంభించే ఉద్యోగులకు 100,000 డాల‌ర్లు పెట్టుబడిగా అందిస్తామని ప్రకటించారు. కొత్త తరం ఉద్యోగుల్లో వ్యవస్థాపక స్ఫూర్తిని నింపేందుకే ఈ నిర్ణయం తీసుకున్నట్లు ఆయన అప్పుడు వివరించారు.