ఏపీకి మరో భారీ పెట్టుబడి.. రూ.29,500 కోట్లతో రెన్యూ సంస్థ ఒప్పందం

ఆంధ్రప్రదేశ్‌లో పునరుత్పాదక ఇంధన రంగంలోకి మరో భారీ పెట్టుబడి రానుంది. ప్రముఖ సంస్థ రెన్యూ పవర్ రాష్ట్రంలో కొత్తగా రెండు భారీ ప్రాజెక్టులను ఏర్పాటు చేసేందుకు ముందుకొచ్చింది. విశాఖపట్నంలో రాష్ట్ర ఐటీ, ఎలక్ట్రానిక్స్, విద్యుత్ శాఖల మంత్రి నారా లోకేశ్‌తో రెన్యూ ఛైర్మన్ అండ్ సీఈవో సుమంత్ సిన్హా భేటీ అయ్యారు. చర్చల అనంతరం రూ.29,500 కోట్ల విలువైన పెట్టుబడులకు సంబంధించిన ఒప్పందంపై సంతకాలు జరిగాయి.

ఈ ఒప్పందం ప్రకారం, రెన్యూ సంస్థ రాష్ట్రంలో 2 గిగావాట్ల పంప్డ్ స్టోరేజీ ప్రాజెక్టులో రూ.12,500 కోట్లు, గ్రీన్ అమ్మోనియా/ఈ-ఫ్యూయల్ ప్రాజెక్టులో రూ.17,000 కోట్లు పెట్టుబడిగా పెట్టనుంది. ఈ సందర్భంగా మంత్రి లోకేశ్ మాట్లాడుతూ.. రాష్ట్రంలో రెన్యూ సంస్థ ఇప్పటికే పలు ప్రాజెక్టులను విజయవంతంగా నిర్వహిస్తుండటంపై అభినందనలు తెలిపారు. మరో రూ.11వేల కోట్ల విలువైన పాలి సిలికాన్, మెటలర్జికల్ గ్రేడ్ సిలికాన్ ప్రాజెక్టు ఏర్పాటుకు సూత్రప్రాయ అంగీకారం తెలిపినందుకు ధన్యవాదాలు తెలియజేశారు. ఈ ప్రాజెక్టులను వేగవంతం చేయాలని, వాటికి అవసరమైన పూర్తి సహాయ సహకారాలను ప్రభుత్వం అందిస్తుందని లోకేశ్ హామీ ఇచ్చారు. అలాగే, తిరుపతి ఐఐటీలో ఏర్పాటు చేయబోయే సోలార్ సెల్ ప్రోటోటైపింగ్ కేంద్రంలో భాగస్వామి కావాలని రెన్యూ సంస్థను కోరారు.

   
రెన్యూ ఛైర్మన్ సుమంత్ సిన్హా మాట్లాడుతూ.. తమ సంస్థ 2015 నుంచే ఏపీలో కార్యకలాపాలు నిర్వహిస్తోందని తెలిపారు. కళ్యాణదుర్గంలో 24 మెగావాట్ల విండ్ ప్రాజెక్టుతో ప్రారంభించి, ప్రస్తుతం 10 ప్రాంతాల్లో 717 మెగావాట్ల విండ్, 60 మెగావాట్ల సోలార్ ప్రాజెక్టులను నడుపుతున్నట్లు వివరించారు. గుంతకల్లులో రూ.22,000 కోట్లతో దేశంలోనే అతిపెద్ద హైబ్రిడ్ పునరుత్పాదక ప్రాజెక్టును నిర్మిస్తున్నామని, రాంబిల్లిలో రూ.4,200 కోట్లతో ఇంగాట్-వేఫర్ ప్లాంట్‌కు శంకుస్థాపన చేశామని గుర్తుచేశారు. తాజాగా కుదిరిన ఒప్పందాలతో ఏపీలో తమ కార్యకలాపాలు మరింత విస్తృతం కానున్నాయని ఆయన పేర్కొన్నారు.