మూడేళ్ల బాలుడి పునర్జన్మ కథ.. సైన్స్‌కు అందని రహస్యం.. పరిశోధకులను సైతం ఆశ్చర్యపరిచిన ఘటన!

పునర్జన్మలు, గత జన్మ స్మృతులు అనేవి సైన్స్‌కు అందని కొన్ని రహస్యాలు. ఇలాంటి వాటిపై ఎవరి వాదనలు వారికి ఉన్నప్పటికీ, కొన్నిసార్లు మన కళ్లముందే నమ్మశక్యం కాని ఘటనలు జరుగుతుంటాయి. సరిగ్గా అలాంటి ఓ సంచలన ఘటనే 1980వ దశకంలో ఉత్తరప్రదేశ్‌లోని ఆగ్రా సమీపంలో చోటుచేసుకుంది. మూడేళ్ల బాలుడు చెప్పిన మాటలు, అతను గుర్తుపట్టిన ఆనవాళ్లు అప్పట్లో దేశవ్యాప్తంగా తీవ్ర చర్చనీయాంశమయ్యాయి.

వివరాల్లోకి వెళితే.. ఆగ్రా సమీపంలోని ఓ గ్రామంలో 1983 డిసెంబర్‌లో టోరన్ సింగ్ (టిటూ) జన్మించాడు. అతనికి కేవలం 18 నెలల వయసున్నప్పటి నుంచి వింతగా ప్రవర్తించడం మొదలుపెట్టాడు. "ఈ ఇల్లు నాది కాదు, నా అసలు పేరు సురేశ్, నాకు ఆగ్రాలో ఒక రేడియో దుకాణం ఉంది, భార్యాబిడ్డలు కూడా ఉన్నారు" అని చెప్పేవాడు. అంతేకాదు తనను ఎవరో కారులో ప్రయాణిస్తుండగా కాల్చి చంపేశారని చెప్పి కుటుంబ సభ్యులను భయపెట్టేవాడు. తన అసలు ఇంటికి తీసుకెళ్లమని తరచూ మారాం చేసేవాడు. తన బంధువుల పేర్లు రాజా బాబు, సుశీల అని కూడా చెప్పేవాడు.

1987 ఏప్రిల్‌లో టిటూ తండ్రి ఆగ్రా వెళ్లినప్పుడు తనను తీసుకెళ్లలేదని ఆ బాలుడు తీవ్రంగా ఏడ్చాడు. ఆ సమయంలో ఆగ్రాలోని సదర్ బజార్‌లో 'సురేశ్ రేడియో' పేరుతో తనకు దుకాణం ఉందని స్పష్టంగా చెప్పాడు. దీంతో ఆశ్చర్యపోయిన టిటూ అన్నయ్య, అతని స్నేహితుడు ఆగ్రా వెళ్లి విచారించగా, నిజంగానే అక్కడ సురేశ్ రేడియో అనే దుకాణం ఉన్నట్లు తెలిసింది. ఆ దుకాణం యజమాని సురేశ్ వర్మ భార్య ఉమా వర్మను వారు కలిశారు. తన భర్త సురేశ్ వర్మను 1983 ఆగస్టు 28న కారులో వెళ్తుండగా గుర్తుతెలియని వ్యక్తులు కాల్చి చంపారని ఆమె ధ్రువీకరించారు.

ఈ విషయం తెలిసిన సురేశ్ వర్మ కుటుంబ సభ్యులు, టిటూ ఉన్న గ్రామానికి వెళ్లారు. అక్కడ ఆ బాలుడు సురేశ్ భార్య ఉమను, తల్లిదండ్రులను, సోదరులను చూడగానే గుర్తుపట్టాడు. అంతేకాదు వారి పిల్లలను ముద్దుపేర్లతో పిలిచి అందరినీ దిగ్భ్రాంతికి గురిచేశాడు. కుటుంబంతో కలిసి వెళ్లిన యాత్రల గురించి, వారి పాత ఇంటి వివరాలను పూసగుచ్చినట్టు వివరించాడు.

అనంతరం టిటూను సురేశ్ రేడియో దుకాణానికి తీసుకెళ్లారు. అక్కడ గోడకు ఉన్న సురేశ్ ఫొటోను చూపించి 'ఇది నేనే' అని చెప్పాడు. దుకాణంలో డబ్బులు దాచే ప్రదేశాన్ని చూపించాడు. సురేశ్ మరణం తర్వాత దుకాణంలో కొత్తగా ఏర్పాటు చేసిన షోకేస్‌ను చూపి, ఇది తాను ఉన్నప్పుడు లేదని చెప్పాడు. అతడిని పరీక్షించేందుకు సురేశ్ సోదరుడి మరో దుకాణానికి తీసుకెళ్లగా, ఇది తనది కాదని ఖరాఖండిగా చెప్పేశాడు.

అన్నింటికంటే ముఖ్యంగా, సురేశ్ వర్మ పోస్టుమార్టం నివేదిక ప్రకారం అతని తలపై బుల్లెట్ గాయాలు ఎక్కడైతే ఉన్నాయో, టిటూ తలపై అవే ప్రాంతాల్లో పుట్టుమచ్చలు ఉండటాన్ని పరిశోధకులు గమనించారు. ఈ కేసు అప్పట్లో ఎంతగా సంచలనం సృష్టించిందంటే, వర్జీనియా విశ్వవిద్యాలయానికి చెందిన పరిశోధకురాలు ఆంటోనియా మిల్స్ వంటి వారు ఈ ఘటనపై లోతుగా అధ్యయనం చేసి వివరాలను నమోదు చేశారు. టిటూ మాటల ఆధారంగా ఏ నేరస్థులకు శిక్ష పడనప్పటికీ, దశాబ్దాలు గడిచినా ఈ పునర్జన్మ కథ ఇప్పటికీ ఒక అంతుచిక్కని రహస్యంగానే మిగిలిపోయింది.