కొడంగల్‌లో కుటుంబసభ్యుల నడుమ రేవంత్ పుట్టినరోజు వేడుక.. ఇందిరమ్మ ఇళ్ల లబ్ధిదారు ఇంట సన్నబియ్యంతో భోజనం

తెలంగాణ ముఖ్యమంత్రి రేవంత్ రెడ్డి తన పుట్టినరోజు వేడుకలను వికారాబాద్ జిల్లాలోని తన సొంత నియోజకవర్గమైన కొడంగల్‌లో కుటుంబసభ్యులు, ప్రజాప్రతినిధుల మధ్య ఘనంగా జరుపుకున్నారు. తన నివాసంలో అర్ధాంగి గీత, కుమార్తె నైమిషారెడ్డి, అల్లుడు సత్యనారాయణరెడ్డి, మనవడి సమక్షంలో సీఎం కేక్ కట్ చేసి వేడుక చేసుకున్నారు.

ఒకవైపు దీపావళి పర్వదినం, మరోవైపు పుట్టినరోజు కావడంతో సీఎం రేవంత్ రెడ్డి కొడంగల్ మండలంలోని పర్సాపూర్ గ్రామంలో పర్యటించారు. అక్కడ గోరిపల్లి సుమిత్ర, శ్రీనివాస్ దంపతులు నూతనంగా నిర్మించుకున్న ఇందిరమ్మ ఇంటిని ముఖ్యమంత్రి స్వయంగా ప్రారంభించారు. ఈ సందర్భంగా ఆ దంపతులకు నూతన వస్త్రాలను బహూకరించారు. అనంతరం వారి ఇంట్లోనే ప్రజాప్రతినిధులతో కలిసి సన్నబియ్యంతో వండిన భోజనాన్ని స్వీకరించారు. భోజనం అనంతరం సీఎం చుట్టూ చేరిన స్థానిక చిన్నారులతో కలిసి ఆయన దీపావళి టపాసులు కాల్చారు. చిన్నారులందరికీ స్వయంగా పెన్నులను బహూకరించి వారిని ఉత్సాహపరిచారు.

ముఖ్యమంత్రికి పుట్టినరోజు సందర్భంగా కొడంగల్ నివాసంలో తెలంగాణ శాసనసభ స్పీకర్ గడ్డం ప్రసాద్ కుమార్ స్వయంగా కలిసి శుభాకాంక్షలు తెలిపారు. మంత్రులు దామోదర రాజనర్సింహ, జూపల్లి కృష్ణారావు, ధనసరి అనసూయ సీతక్క, వాకిటి శ్రీహరి, ఎంపీలు మల్లు రవి, వేం నరేందర్ రెడ్డిలతో పాటు పలువురు ఎమ్మెల్యేలు, ఎమ్మెల్సీలు, వివిధ కార్పొరేషన్ల ఛైర్మన్లు, కాంగ్రెస్ పార్టీ ముఖ్య నేతలు, కార్యకర్తలు సీఎంను కలిసి శుభాకాంక్షలు తెలియజేశారు.

మరోవైపు పలువురు జాతీయ, రాష్ట్ర స్థాయి నేతలు రేవంత్ రెడ్డికి సామాజిక మాధ్యమాల వేదికగా శుభాకాంక్షలు తెలిపారు. కర్ణాటక ముఖ్యమంత్రి డి.కె. శివకుమార్ స్పందిస్తూ, "నా మిత్రుడు, తెలంగాణ ముఖ్యమంత్రి రేవంత్ రెడ్డి గారికి హృదయపూర్వక పుట్టినరోజు శుభాకాంక్షలు. ఆయన ఆయురారోగ్యాలతో వర్ధిల్లాలని, ప్రజలకు సేవ చేయడంలో నిరంతరం విజయాలు సాధించాలని కోరుకుంటున్నాను" అని ‘ఎక్స్’ వేదికగా పేర్కొన్నారు. 

కేరళ ముఖ్యమంత్రి వి.డి. సతీశన్ కూడా స్పందిస్తూ, "నా ప్రియ మిత్రుడు రేవంత్ రెడ్డికి జన్మదిన శుభాకాంక్షలు. తన దార్శనికత, నాయకత్వంతో తెలంగాణ రూపురేఖలను మార్చడంలో ఆయన చేస్తున్న కృషి నిరంతరం కొనసాగాలి. ఆయనకు ఆయురారోగ్యాలు, సుఖసంతోషాలు చేకూరాలని ఆకాంక్షిస్తున్నాను" అని తెలిపారు. కేంద్ర మంత్రులు జి. కిషన్ రెడ్డి, బండి సంజయ్ కుమార్ కూడా సీఎం రేవంత్ రెడ్డికి జన్మదిన శుభాకాంక్షలు తెలియజేశారు.

సినీ రంగం నుంచి మెగాస్టార్ చిరంజీవి ‘ఎక్స్’ వేదికగా ముఖ్యమంత్రికి ప్రత్యేకంగా శుభాకాంక్షలు తెలిపారు. "సినీ పరిశ్రమకు చెందిన వ్యక్తిగా, హైదరాబాద్‌ను గ్లోబల్ సినిమా హబ్‌గా తీర్చిదిద్దాలన్న మీ విజన్‌ను నేను ప్రత్యేకంగా అభినందిస్తున్నాను. 'తెలంగాణ రైజింగ్ 2047' దిశగా మీరు నిర్దేశించుకున్న లక్ష్యాలు మన రాష్ట్రానికి ప్రగతిశీల, సంపన్నమైన, ఉజ్వల భవిష్యత్తుకు బాటలు వేయాలని ఆకాంక్షిస్తున్నాను. మీకు సంపూర్ణ ఆరోగ్యం, ఆనందం కలగాలని, మీ సమర్థ నాయకత్వం మరెన్నో ఏళ్లు కొనసాగాలని మనస్ఫూర్తిగా కోరుకుంటున్నాను" అని చిరంజీవి పేర్కొన్నారు.