భలే పోటీ.. 60 రోజులు నిద్రపోయి రూ. 9.6 లక్షలు గెలుచుకుంది!

బాగా నిద్రపోవడం కేవలం ఆరోగ్యానికే కాదు, అదృష్టాన్ని కూడా తెచ్చిపెడుతుందని నిరూపించింది ముంబైకి చెందిన జినియా ఛటర్జీ. ప్రముఖ పరుపుల తయారీ సంస్థ 'వేక్‌ఫిట్' నిర్వహించిన ఐదో సీజన్ 'స్లీప్ ఇంటర్న్‌షిప్' పోటీలో ఆమె విజేతగా నిలిచింది. ఈ విజయంతో రూ. 9.6 లక్షల నగదు బహుమతితో పాటు విహార యాత్రను కూడా గెలుచుకుంది.

దేశవ్యాప్తంగా వచ్చిన 2 లక్షలకు పైగా దరఖాస్తుల నుంచి 10 మందిని ఈ పోటీకి ఎంపిక చేశారు. రెండు నెలల (60 రోజులు) పాటు సాగిన ఈ ఇంటర్న్‌షిప్‌లో ప్రతిరోజూ తగినంత నిద్రపోవడం, సరైన నిద్ర వేళలు పాటించడం, నిద్ర సరళిని ట్రాక్ చేయడం వంటివి ప్రధాన నిబంధనలు. అయితే, ఇది కేవలం నిద్రపోవడానికే పరిమితం కాలేదు. పోటీదారుల సృజనాత్మకతను పరీక్షించేందుకు వారానికోసారి ప్రత్యేక ఛాలెంజ్‌లు నిర్వహించారు.

'స్లీప్ సినిమా' పేరుతో ప్రముఖ సినిమాల్లోని సన్నివేశాలను నిద్రకు సంబంధించిన థీమ్‌తో పునఃసృష్టించడం, 'స్లీప్ బింగో' ద్వారా తమ నిద్ర అలవాట్లను సమీక్షించుకోవడం వంటివి ఇందులో ఉన్నాయి. అలాగే, 'అండర్‌కవర్ స్లీప్ మిషన్' అనే మరో ఛాలెంజ్‌లో, సంభాషణ మధ్యలో ఎదుటివారికి తెలియకుండా 'దుప్పటి' లేదా 'దిండు' అనే పదాలను 10 సార్లు వాడాల్సి ఉంటుంది. ఇలా ప్రతి వారం ఉత్తమ ప్రదర్శన కనబరిచిన వారిని 'ప్రో స్లీపర్ ఆఫ్ ది వీక్'గా ప్రకటించారు.

ఈ పోటీ చివరిలో రత్నగిరి మణికందన్, జినియా ఛటర్జీ, మెహెక్ ఖోట్ టాప్-3గా నిలిచారు. అయితే, అత్యధిక వారపు ఛాలెంజ్‌లలో గెలిచిన హైదరాబాద్‌కు చెందిన కరీం ఖాన్ వైల్డ్ కార్డ్ ఎంట్రీ ద్వారా ఫైనల్‌కు అర్హత సాధించాడు. దీంతో నలుగురు ఫైనలిస్టులతో 'బిగ్ బెడ్డ్' పేరుతో గ్రాండ్ ఫినాలే నిర్వహించారు. 

ఇందులో 'మెమరీ ఫోమ్ ఛాలెంజ్', 'స్లీప్ ఆక్షన్' వంటి ఆసక్తికరమైన టాస్క్‌లు పెట్టారు. చివరి రాత్రి ఫైనలిస్టుల నిద్ర స్కోర్ల ఆధారంగా విజేతను నిర్ణయించారు. అన్ని టాస్క్‌లలోనూ, తుది నిద్ర స్కోర్‌లోనూ అగ్రస్థానంలో నిలిచిన జినియా ఛటర్జీ టైటిల్‌ను కైవసం చేసుకుంది.

2019లో ప్రారంభమైన ఈ స్లీప్ ఇంటర్న్‌షిప్‌కు గత నాలుగు సీజన్లలోనే 10 లక్షలకు పైగా దరఖాస్తులు రావడం విశేషం. ఇప్పటివరకు 65 మంది ఇంటర్న్‌లు తలా రూ. 1 లక్ష స్టైఫండ్ అందుకున్నారు.