ఆరోగ్యకరమైన దీపావళికి సిద్ధమవ్వండి.. ఈ ఒక్క రోజు ఇలా చేస్తే చాలు!

దీపావళి పండగ వాతావరణం దేశవ్యాప్తంగా నెలకొంది. ఈ పండగ అంటేనే నోరూరించే పిండివంటలు, స్వీట్లు, ఘుమఘుమలాడే వంటకాలు గుర్తుకొస్తాయి. అయితే, వరుసగా రెండు మూడు రోజుల పాటు బరువైన ఆహారం తీసుకోవడం వల్ల జీర్ణవ్యవస్థపై భారం పడి, అనారోగ్య సమస్యలు తలెత్తే అవకాశం ఉంటుంది. 

ఈ నేపథ్యంలో అసలైన పండగ విందులకు ముందు శరీరాన్ని సిద్ధం చేసుకునేందుకు ఒక సులభమైన మార్గాన్ని ఆరోగ్య నిపుణులు సూచిస్తున్నారు. నరక చతుర్దశిగా పిలుచుకునే చోటీ దీపావళి రోజున ఒక్క రోజు పాటు తేలికపాటి ఆహారం తీసుకుని, శరీరాన్ని శుద్ధి (బాడీ క్లెన్స్) చేసుకోవడం ఎంతో మేలని వారు చెబుతున్నారు.

ఈ విధానం వల్ల శరీరంలోని విషపదార్థాలు (టాక్సిన్లు) బయటకు వెళ్లిపోవడమే కాకుండా, జీవక్రియ (మెటబాలిజం) కూడా వేగవంతమవుతుంది. జీర్ణవ్యవస్థకు తగినంత విశ్రాంతి లభించి, పండగ రోజున తీసుకునే భారీ భోజనాన్ని సులభంగా జీర్ణం చేసుకునేందుకు సిద్ధమవుతుంది. ఈ అంశంపై ఆరోగ్య నిపుణులు పలు కీలక సూచనలు చేశారు.

ఉదయం ఇలా ప్రారంభించాలి
చోటీ దీపావళి రోజున ఉదయాన్నే ఒక గ్లాసు గోరువెచ్చని నీటిలో సగం నిమ్మకాయ రసం, చిటికెడు పసుపు కలుపుకుని తాగాలి. ఇది సహజసిద్ధమైన పానీయంగా పనిచేసి, శరీరంలోని టాక్సిన్లను తొలగించడంలో, జీవక్రియను మెరుగుపరచడంలో, జీర్ణవ్యవస్థ పనితీరును సులభతరం చేయడంలో అద్భుతంగా సహాయపడుతుంది.

తేలికపాటి అల్పాహారం
అల్పాహారంలో నూనెలో వేయించిన, బరువైన పదార్థాలకు బదులుగా పీచుపదార్థాలు (ఫైబర్) అధికంగా ఉండే వాటిని ఎంచుకోవాలి. గోధుమ రవ్వతో చేసిన దలియా, ఓట్స్, తాజా పండ్లతో చేసిన సలాడ్ లేదా స్మూతీ బౌల్స్ వంటివి తీసుకోవడం ఉత్తమం. ఇవి కడుపు నిండిన అనుభూతిని ఇవ్వడమే కాకుండా, శరీరాన్ని అంతర్గతంగా శుభ్రపరచడంలో సహాయపడతాయి.

భోజనం, పండ్లు, ద్రవపదార్థాలు
మధ్యాహ్నం, రాత్రి భోజనాల్లో కూడా తేలికపాటి ఆహారానికే ప్రాధాన్యత ఇవ్వాలి. పాలకూర, సొరకాయ, మెంతికూర వంటి ఆకుపచ్చ కూరగాయలను ఉడికించి సూపులుగా లేదా పెసరపప్పుతో కలిపి ఖిచ్డీగా వండుకుని తినడం చాలా మంచిది. ఇవి తేలికగా జీర్ణమై శరీరానికి భారం కలిగించవు. 

మధ్యమధ్యలో ఆపిల్, బొప్పాయి, దానిమ్మ, కివి, నారింజ వంటి యాంటీఆక్సిడెంట్లు అధికంగా ఉండే పండ్లను తినాలి. అయితే, చక్కెర ఎక్కువగా ఉండే ప్యాకేజ్డ్ జ్యూసులకు మాత్రం దూరంగా ఉండటం తప్పనిసరి.

శరీరం డీహైడ్రేట్ కాకుండా ఉండేందుకు రోజంతా నీరు ఎక్కువగా తాగుతుండాలి. నిమ్మరసం కలిపిన నీరు, కొబ్బరి నీళ్లు, హెర్బల్ టీ లేదా సోంపు నీళ్లు వంటివి తీసుకోవడం ద్వారా శరీరం మరింత శుద్ధి అవుతుంది. చోటీ దీపావళి రోజున ఈ చిన్న చిన్న మార్పులు చేసుకోవడం ద్వారా శరీరాన్ని పండగకు సంసిద్ధం చేసి, ఎలాంటి ఇబ్బందులు లేకుండా దీపావళి ఆనందాన్ని పూర్తిస్థాయిలో ఆస్వాదించవచ్చని నిపుణులు భరోసా ఇస్తున్నారు.