ప్రపంచ మార్కెట్లు ఢమాల్‌.. భారత సూచీలు మాత్రం రయ్‌ రయ్‌: కారణాలివే..!

అమెరికా, ఆసియా స్టాక్‌ మార్కెట్లు భారీ పతనాన్ని చవిచూసినా.. భారత స్టాక్‌ మార్కెట్లు మాత్రం అందుకు భిన్నంగా దూసుకెళ్లాయి. విదేశీ పెట్టుబడుల ప్రవాహం, ముడిచమురు ధరల తగ్గుదల, కంపెనీల మెరుగైన త్రైమాసిక ఫలితాలు దేశీయ మార్కెట్లకు అండగా నిలిచాయి. దీపావళి పండగ వేళ దలాల్‌ స్ట్రీట్‌లో ఇన్వెస్టర్లకు లాభాల సందడి నెలకొంది. వరుసగా ఏడో సెషన్‌లోనూ మార్కెట్లు లాభాలతో ముగిశాయి.

సెన్సెక్స్‌ 1,718.01 పాయింట్లు (2.17 శాతం) లాభపడి 81,028.02 వద్ద స్థిరపడింది. నిఫ్టీ 493.75 పాయింట్లు (2.01 శాతం) పెరిగి 25,030.35 వద్ద ముగిసింది. దీంతో నిఫ్టీ మళ్లీ 25 వేల మార్కును అధిగమించింది. సెన్సెక్స్‌లో మహీంద్రా అండ్‌ మహీంద్రా అత్యధికంగా 6.15 శాతం లాభపడింది. ఐసీఐసీఐ బ్యాంక్‌ 4.65 శాతం, హెచ్‌డీఎఫ్‌సీ బ్యాంక్‌ 3.56 శాతం, టైటాన్‌ 3.36 శాతం, యాక్సిస్‌ బ్యాంక్‌ 3.19 శాతం చొప్పున పుంజుకున్నాయి. ప్రైవేట్‌ బ్యాంకుల షేర్లలో కొనుగోళ్ల జోరు కనిపించింది. నిఫ్టీ ప్రైవేట్‌ బ్యాంక్‌ సూచీ 3.22 శాతం పెరిగింది.

అయితే మిడ్‌క్యాప్‌, స్మాల్‌క్యాప్‌ షేర్లలో అంతగా ఉత్సాహం కనిపించలేదు. నిఫ్టీ మిడ్‌క్యాప్‌ 100 స్వల్పంగా 0.02 శాతం నష్టపోగా, స్మాల్‌క్యాప్‌ 100 సూచీ 0.82 శాతం పడిపోయింది. మార్కెట్‌ ఒడుదొడుకులను సూచించే ఇండియా విక్స్‌ 13.35 శాతం పెరిగి 17.66కు చేరింది. అంటే సూచీలు భారీ లాభాల్లో ముగిసినా.. మార్కెట్‌లో అనిశ్చితి పూర్తిగా తొలగిపోలేదని స్పష్టమవుతోంది.

మార్కెట్లు పెరగడానికి కారణాలివే?
అమెరికా మార్కెట్లలో కృత్రిమ మేధ (ఏఐ) రంగానికి చెందిన షేర్లు భారీగా పడిపోతున్నాయి. ఏఐ మౌలిక సదుపాయాలు, డేటా సెంటర్లపై పెట్టుబడుల భవిష్యత్తు, వాటిపై కఠిన నిబంధనలు వచ్చే అవకాశాలపై ఇన్వెస్టర్లు ఆందోళన చెందుతున్నారు. నాస్‌డాక్‌ 19 నెలల్లోనే అతిపెద్ద రోజువారీ పతనాన్ని నమోదు చేసింది. దీనికి భిన్నంగా ఏఐ మౌలిక సదుపాయాల రంగంపై భారత్‌ ప్రత్యక్షంగా తక్కువ ఆధారపడటం దేశీయ మార్కెట్లకు కలిసొస్తోంది.

విదేశీ సంస్థాగత పెట్టుబడిదారులు (ఎఫ్‌ఐఐలు) మళ్లీ భారత షేర్ల కొనుగోళ్లకు మొగ్గు చూపుతున్నారు. గురువారం ఒక్కరోజే దాదాపు రూ.15 వేల కోట్ల విలువైన షేర్లను కొనుగోలు చేశారు. దాదాపు ఆరేళ్లలో ఇదే అత్యధిక నికర కొనుగోళ్లు కావడం విశేషం. మరోవైపు ముడిచమురు ధరలు తగ్గడం, రూపాయి బలపడటం, అమెరికా ట్రెజరీ బాండ్ల రాబడులు తగ్గడం కూడా భారత మార్కెట్లకు సానుకూలంగా మారాయి. శుక్రవారం బ్రెంట్‌ క్రూడ్‌ బ్యారెల్‌ ధర 97.46 డాలర్లకు చేరింది.

కంపెనీల త్రైమాసిక ఫలితాలు కూడా మార్కెట్లకు ఊతమిచ్చాయి. రెండో త్రైమాసికంలో మహీంద్రా అండ్‌ మహీంద్రా ఏకీకృత లాభం 25 శాతం పెరగడంతో ఆ షేరు భారీగా రాణించింది. టైటాన్‌, ఇన్ఫోసిస్‌, టీసీఎస్‌, హెచ్‌సీఎల్‌ టెక్నాలజీస్‌, భారతీ ఎయిర్‌టెల్‌ షేర్లలోనూ కొనుగోళ్లు జరిగాయి. ఇటీవలి పతనంతో పెద్ద కంపెనీల షేర్ల ధరలు ఆకర్షణీయ స్థాయికి చేరడం కూడా ఇన్వెస్టర్లను కొనుగోళ్ల వైపు మళ్లించింది.