మా ‘లడ్డూ’ను వెతికి పెడితే రూ.లక్ష రివార్డు ఇస్తాం.. పెంపుడు చిలుక కోసం యజమానుల విన్నపం

తాము అల్లారుముద్దుగా పెంచుకున్న పెంపుడు చిలుక కనిపించకుండా పోవడంతో గుజరాత్‌లోని ఓ కుటుంబం తీవ్ర ఆవేదన చెందుతోంది. దాన్ని తమ కొడుకులా చూసుకున్నామని, దాని ఆచూకీ తెలిపిన వారికి లక్ష రూపాయల బహుమతి ఇస్తామని ప్రకటించింది. తమ ‘లడ్డూ’ను వెతికి పెట్టాలంటూ వడోదర నగరవాసులను ఆ కుటుంబం కన్నీటితో వేడుకుంటోంది.

వివరాల్లోకి వెళితే.. వడోదరలోని సేవాసి రోడ్డు ప్రాంతంలో నివసించే పారిఖ్ కుటుంబం నాలుగు నెలల క్రితం పుణె నుంచి ఆరు నెలల వయసున్న ఆఫ్రికన్ గ్రే ప్యారట్‌ను తీసుకొచ్చింది. దానికి 'లడ్డూ' అని పేరు పెట్టి, ఇంట్లో సభ్యుడిలా చూసుకుంటున్నారు. అయితే అక్టోబర్ 31వ తేదీ సాయంత్రం 7 గంటల సమయంలో అది పంజరం తలుపు తెరుచుకుని బయటకు ఎగిరిపోయింది. దీంతో ఆ కుటుంబం తీవ్ర ఆందోళనకు గురైంది.

"లడ్డూ మాకు కేవలం పెంపుడు చిలుక కాదు, మా కంటిపాప. మా హృదయంలో ఒక భాగం. దానికి సొంతంగా ఆహారం తినడం రాదు. నేనే రోజూ తినిపించేదాన్ని. నాలుగు రోజులుగా అది ఆకలితో ఎంత బాధపడుతోందోనని తలుచుకుంటే గుండె తరుక్కుపోతోంది" అని జెస్సికా పారిఖ్ కన్నీటిపర్యంతమయ్యారు. సేవాసి, గోత్రి, భాయ్లీ సహా నగరంలోని అనేక ప్రాంతాల్లో తాము విస్తృతంగా గాలించామని, అయినా ఆచూకీ లభించలేదని ఆమె తెలిపారు. లౌడ్‌స్పీకర్లలో తమ గొంతును, పిలుపులను రికార్డ్ చేసి వినిపించినా ప్రయోజనం లేకపోయిందన్నారు.

లడ్డూ గుర్తింపు వివరాలు
ఆఫ్రికన్ గ్రే ప్యారట్ జాతి చిలుకలు చాలా తెలివైనవని, మనుషులతో త్వరగా మమేకమవుతాయని జెస్సికా వివరించారు. లడ్డూను సులభంగా గుర్తించవచ్చని, దాని కాలికి లైసెన్స్ నంబర్‌తో కూడిన రింగ్ ఉంటుందని తెలిపారు. ముక్కు మీద చిన్న గీత, కంటి దగ్గర సూదిమొనంత గాయం ఉన్నాయని చెప్పారు. ఎవరైనా దాన్ని పట్టుకుంటే, వీడియో కాల్ చేసి చూపిస్తే తాము వెంటనే గుర్తుపడతామని అన్నారు. కొత్తవాళ్లను చూస్తే అది భయపడి నిశ్శబ్దంగా ఉంటుందని, పేరు పెట్టి పిలిస్తే పలకదని, కానీ ఈల వేస్తే తప్పకుండా స్పందిస్తుందని తెలిపారు. తమ ‘లడ్డూ’ ఆచూకీ తెలిపిన వారికి లక్ష రూపాయలు బహుమతిగా ఇస్తామని, వడోదర ప్రజలందరూ సహకరిస్తే తమ కొడుకును త్వరగా కనుగొనగలమని వారు ఆశాభావం వ్యక్తం చేశారు.