కనిపించకుండా పోయిన చిలుక ఆచూకీ చెప్పండి.. లక్ష రివార్డ్ పొందండి!

వడోదరలో ఓ కుటుంబం తమ ఇంట్లో పెంచుకుంటున్న చిలుక కోసం తీవ్రంగా ఆందోళన చెందుతోంది. బిడ్డలా చూసుకుంటున్న ‘లడ్డూ’ అనే ఆరు నెలల ఆఫ్రికన్ గ్రే జాతి చిలుక కనిపించకుండా పోవడంతో, దానిని వెతికి పట్టుకొచ్చిన వారికి ఏకంగా రూ.1 లక్ష బహుమతిగా ఇస్తామని ప్రకటించింది.

పారిఖ్ కుటుంబం తెలిపిన వివరాల ప్రకారం, అక్టోబర్ 31వ తేదీ సాయంత్రం 7 గంటల సమయంలో లడ్డూ, తన పంజరం తలుపును అదే తెరుచుకుని బయటకు ఎగిరిపోయింది. అప్పటి నుంచి దాని కోసం తీవ్రంగా గాలిస్తున్నారు. పుణేలోని ఓ బ్రీడర్ నుంచి తెచ్చుకున్న ఈ చిలుకకు దానంతట అదే ఆహారం తినడం రాదని, అందుకే తాము మరింత ఆందోళన చెందుతున్నామని దానిని పెంచుకుంటున్న జెస్సికా పారిఖ్ తెలిపారు.

లడ్డూ కోసం సేవాసి, గోత్రి, భయ్లీ వంటి ప్రాంతాల్లో వెతికారు. తమ వాయిస్‌ను రికార్డ్ చేసి ప్లే చేయడం, ఈలలు వేయడం వంటి ప్రయత్నాలు చేసినా ఫలితం లేకపోయింది. దాని కాలికి లైసెన్స్ నంబర్‌తో కూడిన రింగ్ ఉందని, బహుశా అది ఏదైనా నిర్మానుష్య ప్రదేశంలో లేదా నది సమీపంలో ఉండవచ్చని కుటుంబ సభ్యులు భావిస్తున్నారు. ఆఫ్రికన్ గ్రే జాతి చిలుకలు తమ యజమానులతో చాలా బలమైన బంధాన్ని ఏర్పరుచుకుంటాయని చెబుతారు. ఇప్పుడు తమ లడ్డూ తిరిగి రావాలని ఆ కుటుంబం ఆశగా ఎదురుచూస్తోంది.