అచ్చం సినిమాలో జరిగినట్టే.. మత గురువును ఇరికించేందుకు పోలీసుల కుట్ర.. వీడియో ఇదిగో !

సాధారణంగా కొన్ని ఘటనలు సినిమాలకే పరిమితం అనుకుంటాం. కానీ నిజంగా కూడా జరుగుతాయని పంజాబ్ పోలీసులు నిరూపించారు. ఓ మత గురువును అరెస్ట్ చేసేందుకు పోలీసులు పన్నిన కుట్ర వెలుగులోకి వచ్చి కలకలం రేపింది. సీసీటీవీలో రికార్డైన దృశ్యం అందరినీ విస్తుపోయేలా చేసింది.  లుథియానాలోని ఖన్నా ప్రాంతంలో జరిగిన ఈ ఘటనలో ఓ ఏఎస్ఐని సస్పెండ్ చేయగా, అరెస్ట్ అయిన మత గురువును అధికారులు వెంటనే విడుదల చేశారు.

అసలేం జరిగిందంటే?
స్థానికంగా ఉండే మహంత్ కశ్మీర్ గిరి అనే మత గురువు డ్రైవర్ గుర్జంత్ సింగ్‌ను పోలీసులు డ్రగ్స్ కేసులో అరెస్ట్ చేశారు. ఈ కేసులో మహంత్‌కు కూడా ప్రమేయం ఉందన్న ఆరోపణలతో ఆయన ఇంట్లో సోదాలు నిర్వహించారు. మంచం కింద హెరాయిన్ లభించిందని పేర్కొంటూ మహంత్‌ను అదుపులోకి తీసుకున్నారు.

అయితే, పోలీసుల తీరుపై అనుమానం వచ్చిన మహంత్ కుటుంబ సభ్యులు ఇంట్లో రహస్యంగా అమర్చిన సీసీ కెమెరా ఫుటేజీని పరిశీలించారు. అందులో అధికారిక సోదాల బృందం రాకముందే, మఫ్టీలో ఉన్న ఓ ఏఎస్ఐ ఇంట్లోకి ప్రవేశించి, గదులను పరిశీలించి, మంచం కింద ఓ చిన్న ప్యాకెట్‌ను పెట్టడం స్పష్టంగా కనిపించింది. ఆ తర్వాత వచ్చిన పోలీస్ బృందం, ఆ ప్యాకెట్‌ను "కనుగొన్నట్లు" నాటకమాడి మహంత్‌ను అరెస్ట్ చేసింది.

ఈ వీడియోను కుటుంబ సభ్యులు ఉన్నతాధికారుల దృష్టికి తీసుకెళ్లారు. ఫుటేజీని పరిశీలించిన అధికారులు, ప్రాథమిక విచారణ అనంతరం ఏఎస్ఐ సుఖ్‌దేవ్ సింగ్‌ను సస్పెండ్ చేశారు. మహంత్ కశ్మీర్ గిరిని వెంటనే విడుదల చేశారు. ఈ ఘటనపై సమగ్ర విచారణ జరిపేందుకు ఒక ప్రత్యేక దర్యాప్తు బృందాన్ని ఏర్పాటు చేశారు. పోలీసులే ఇలా డ్రగ్స్ పెట్టి కేసులో ఇరికించేందుకు ప్రయత్నించడం పంజాబ్‌లో తీవ్ర చర్చనీయాంశంగా మారింది.