61 ఏళ్లలోనూ అదే ఫిట్‌నెస్.. షారుక్ ఖాన్ సీక్రెట్ ఇదే!

బాలీవుడ్ బాద్‌షా, కింగ్ ఖాన్ షారుక్ ఖాన్ నేడు 61వ పుట్టినరోజు జరుపుకుంటున్నారు. ఈ వయసులో కూడా ఆయన ఎంతో చురుకుగా, ఫిట్‌గా ఉండటం వెనుక ఉన్న రహస్యాలపై అభిమానులు, మీడియా వర్గాల్లో ఆసక్తికర చర్చ జరుగుతోంది. గతంలో ఆయన పంచుకున్న సింపుల్ ఫిట్‌నెస్, ఆహారపు అలవాట్లు మరోసారి వెలుగులోకి వచ్చాయి. ముఖ్యంగా ఆయన రోజుకు ఒక్కపూట మాత్రమే భోజనం చేస్తారనే విషయం అందరినీ ఆశ్చర్యపరుస్తోంది.

2024లో 'ది గార్డియన్'కు ఇచ్చిన ఓ ఇంటర్వ్యూలో షారుక్ తన ఆహారపు అలవాట్ల గురించి మాట్లాడారు. తాను సాధారణంగా రోజుకు ఒక్క పూట మాత్రమే భోజనం చేస్తానని, ఇది ఇంటర్‌మిటెంట్ ఫాస్టింగ్ లాంటి పద్ధతి కాదని, కేవలం తన వ్యక్తిగత ఇష్టమని స్పష్టం చేశారు. తన రోజువారీ భోజనంలో మొలకలు, గ్రిల్డ్ చికెన్, బ్రకోలీ, కొద్దిగా పప్పు వంటి సాధారణ పదార్థాలే ఉంటాయని తెలిపారు. అయితే, ఇతరుల ఇళ్లకు భోజనానికి వెళ్లినప్పుడు బిర్యానీ, పరాఠాలు, లస్సీ వంటివి ఇష్టంగా తింటానని చెప్పారు.

ఆహార నియమాలతో పాటు వ్యాయామానికి కూడా షారుక్ ఎంతో ప్రాధాన్యత ఇస్తారు. రాత్రిపూట షూటింగ్స్ నుంచి ఆలస్యంగా ఇంటికి వచ్చాక కూడా దాదాపు 30 నిమిషాల పాటు వ్యాయామం చేస్తానని ఆయన గతంలో పేర్కొన్నారు. ఆయన ఫిట్‌నెస్ ట్రైనర్ ప్రశాంత్ సావంత్ ప్రకారం షారుక్ వారంలో నాలుగు నుంచి ఐదు రోజులు, ఒక్కో సెషన్‌లో 45 నిమిషాల పాటు క్రమపద్ధతిలో వర్కవుట్లు చేస్తారు. ఈ సమయంలో శరీరంలోని వేర్వేరు కండరాలపై దృష్టి పెడతారని తెలిపారు.

కరోనా మహమ్మారి సమయంలో షూటింగులు లేకపోవడంతో వ్యాయామంపై ఎక్కువ దృష్టి పెట్టానని, ఆ సమయంలో అలవడిన క్రమశిక్షణే ఆ తర్వాత శారీరకంగా శ్రమతో కూడిన పాత్రలు చేయడానికి ఎంతగానో ఉపయోగపడిందని షారుక్ వివరించారు.